Tselatra

Velarantany 220 ha may nandritra ny taona 2024. Valan-javaboahary arovana ny 10 ha tamin’ireo. Mpandoro ala miisa 15 efa notanana am-ponja. Heloka niniana natao avokoa ny ankamaroany niampangana ireo nahavanon-doza.
Mpiondrana antsokosoko miisa 73 tra-tehaky ny zandarimaria nandritra ny taona 2024. Nahitana fihenana io tranga io raha oharina tamin’ny taona 2023 satria nananika ny 82 tamin’izany.
Nikasa hamaky valana omby, maty voatifitry ny mpitandro filaminana ny jiolahy iray tao Ambany Andre­fana, kaominina Ampangabe, ny 13 janoary teo. Telo lahy ireo niaraka nanao io asa ratsy io saingy lavo ny iray rehefa nikasa hamaly ny zandary.
Taxi-be 135 nifatratra tamin’ny daba fanariam-pako tetsy Vatosoa, omaly. Nikorisa avy any amin’ny lalan’Ankadindramamy io fiara io kinanjo tsy nahatana ny hisatra. Tsy nisy aina nafoy.