Adidy tsy maintsy ataon’ny mpiasam-panjakana ambony ny manao fanambaram-pananana eny amin’ny Birao mahaleo tena miady amin’ny kolikoly (Bianco), efa nanomboka ny taona 2024. Tafapetraka omaly, ny Vovonana niomerika hikirakirana ny antontam-baovao, raha natao tanana ny fikirakirana azy hatramin’izay. Nahatratra 77 274 ny fanambaram-pananana voarain’ny Bianco nanomboka ny taona 2004, nataon’ny olona miisa 12 290. Nilaza ny tale jeneraly (DG) ny Bianco, Razakamanantsoa Gaby Nestor, fa “fitaovana niomerika hitahirizana ny fanambaram-pananana sy ny tombontsoa ara-toekarena tsy maintsy ataon’ny mpiasam-panjakana ambony ity fitaovana ity. Sazy enim-bolana hatramin’ny 5 taona, miampy lamandy 50 hatramin’ny 200 tapitrisa Ar no miandry izay tsy manao fanambaram-pananana”. Ao anatin’ny tetikasa Pregodi, vatsian’ny Banky afrikana ho an’ny fampandrosoana (Bad) vola izao dingana izao. Miara-miasa amin’ny minisiteran’ny Toekarena sy ny fitantanam-bola (MEF) sy ny minisitera misahana ny Fampiroboroboana ny haitao ara-kajy mirindra, ny paositra sy ny fifandraisan-davitra (MNDPT).
“Tetikasa entina mikirakira sy mamantatra ny fivoaran’ny fananana izay voarain’ny Bianco ary hahamora ny fanadihadiana ity fitaovana ity”, hoy Ramanampanoharana Andry, Sekretera jeneralin’ny MEF, sady filohan’ny Komity mpitarika ny tetikasa Pregodi.
Henintsoa Hani
French