Tselatra

Nifamely totohondry ny mpandeha iray sy ny reseveran’ny taxi-be 172, omaly maraina teo Tanjombato. Vola 100Ar no fototry ny olana satria tsy ampy an’io 100Ar io ny saran-dalan’ilay raim-pianakaviana. Nilaza izy fa eny Ankadimbahoaka no miala ka 500Ar ihany no nomeny, saingy tsy nanaiky io saran-dalana io ilay resevera. Vokany, vaky ny vavan’ilay resevera.
Hita faty tao anaty rano ny lehilahy iray mpitsena omby tao Mananara Avaratra, omaly. Mpanjono hanao ny asany no nahatsikaritra ny fisiana vatana mangatsika tao anatin’ny rano ka nampiakatra izany.
Zazamenavava narian-dreniny avotra soa aman-tsara teny Ambatomirahavavy, ny talata 14 janoary teo. Feon-jaza nitomany tao anaty lavapiringa no ren’ny manodidina. Nalain’izy ireo ilay zaza ka velonaina. Karohina kosa ilay renim-pianakaviana nanao izao fihetsika feno habibiana izao.
Hiakatra fampanoavana, anio, ireo roa lahy voarohirohy ho tompon’antoka tamin’ny fanaovana solika hosoka tao Toamasina. Mitohy ny fikarohan’ny zandary ny naman”ireo roa lahy mpanampoka solika tao amin’ny RN5 ireo. Amidin’ireo tsy mataho-tody 3 000 Ar hatramin’ny 4 000 Ar ny litatra an’ny solika voatampoka.