Roa volana nifampitadiavana, ankizivavy varira 12 taona avotry ny zandarimaria tao amin’ny kaominina Behara, distrikan’Amboasary Atsimo, afakomaly. Nalain’ny mpaka an-keriny tao amin’ny fokontany Mokabe, distrikan’i Toalagnaro, io ankizy io tamin’ny 13 oktobra 2024. Nanao fikarohana ny fianakaviany sy ny mpitandro filaminana ka nisy tamin’ireo olon-dratsy tra-tehaka tamin’io andro io. Nentina natolotra ny fitsarana izy ireo ka voatana am-ponja. Tsy hita hatrany anefa ilay ankizy noho ireo olona voasambotra ireo tsy nitoroka sy nilaza ho tsy nahay ny toerana nisy azy. Ny alahady 19 janoary teo, naharay loharanom-baovao ny zandarimaria fa mivezivezy entin’ireo dahalo tao amin’ny kaominina Behara io ankizy karohina io. Natao takalonaina hatrany ity farany ka tsy afa-nandositra ireo mpaka an-keriny. Voatery nanaraka ny sitrapon’ireo tsy mataho-tody izy. Raikitra ny fifandonana tamin’ireo dahalo ireo sy ny mpitandro filaminana. Maty voatifitra tamin’izany ny efa-dahy. Nitsoaka ireo namany. Avotra soa aman-tsara ilay ankizivavy 12 taona. Naverina eny anivon’ny fianakaviany izy. Nanamafy ireo solombavambahoaka ao an-toerana fa tsy ekena velively ny fisian’ny dahalo mampiteraka tsy fandriampahalemana ao an-toerana. Vonona hatrany hiara-hiasa amin’ny mpitandro filaminana hamongotra ireo olon-dratsy izy ireo.
Tsiferana R.
French