Enina mianadahy niray tsikombakomba manondrana Malagasy miasa any amin’ny tany arabo tra-tehaky ny polisy. Nalefa eny Antanimora taorian’ny fampanoavana ireo voasaringotra, ny 21 janoary teo. Nihaodihaody teny Anosy tao amin’ny toerana fanaovana pasipaoro, olona am-polony nampiahiahy ny mpitandro filaminana. Nanaovana fanadihadiana lalina ny momba ny tany handehanan’izy ireo. Nandrisika azy ireo hanao ny fangatahana pasipaoro ny hiasa any ivelany. Miisa 15 mianadahy ireo olona tra-tehaka ireo. Natao famotorana, mikasa hahazo pasipaoro ahafahany mandeha any Oman ny sivy. Olona enina hafa mpikarakara ny taratasy izay anisan’ny lohandohany anatin’ilay tambajotra mpanondrana olona. Manana taratasy hosoka maromaro izy ireo. Entina hanampiana sy hanamorana ny fahafaha-mivoaka ny sisintany malagasy ho an’ireo mpiasa mikasa hiondrana no tanjony amin’izany. Niara-notanana natao fanadihadiana izy ireo. Voamarina fa nahazahoan’ ireo mpanondrana olona ireo vola avokoa ireo vehivavy nikasa hiasa any ivelany ireto. Voatazona am-ponja vonjimaika izy enina mianadahy mandra-piandry ny fotoam-pitsarana.
73 tra-tehaka
Nahatratra 73 mianadahy ireo mpiondrana antsokosoko saron’ny mpitandro filaminana ho an’ny zandarimariam-pirenena tamin’ny taona 2024. Nahitana malagasy sy teratany vahiny izany. Na izany aza, mitohy ny ady atao amin’ireo tambajotra manamora ny fahafahan’ireny olona ireny mivoaka na miditra ny sisintany malagasy kanefa tsy manara-dalàna. Miara-miasa ny eo anivon’ny mpitandro filaminana rafetin’ny polisim-pirenena sy ny zandarimaria amin’ ny fanatrarana azy ireny.
Tsiferana R.
French