Araka ny vaovao navoakan’ny gazety iray atsy La Réunion, ny sabotsy lasa teo, nifindra ao amin’ny klioban’ny La Cressonnière, ilay Malagasy mpilalao ping-pong, i Jonathan Nativel. Mandritra ity taom-pilalaovana 2025 ity, no hiarovany indray ny lokon’ity ekipa vaovao hilalaovany ity. Mpilalao tany Frantsa ny lehilahy fahiny ary izao mitodidoha ao La Réunion izao. “Safidy ny foko ny hilalao aty La Réunion, betsaka ny zavatra tiako hampitaina ato amin’ity klioba ity, mba hametraka tsangam-bato. Eo koa ny antony manokana ary ny ara-panatanjahantena”, hoy izy.
Tsiahivina fa 37 taona i Nativel ankehitriny saingy mbola manana ny maha izy azy, eo amin’ity taranja ity. Izy no Malagasy mpilalao nandrombaka medaly volamena telo nandritra ny lalaon’ny Nosy (JIOI 2023), notanterahina teto Madagasikara. Teo amin’ny olon-tokana, ny olon-droa lehilahy ary ny isan-tarika no nahazoany izany.
Tsy nanafina ny hafaliany i Nelson Fontaine, mpanazatra ny La Cressonnière, ny amin’ny fahatongavan’i Jonathan Nativel. “Tanjona iarahana amin’i Nativel, ny handrombahana indray ny ho tompondakan’i La Réunion, eo amin’ny isan-tarika amin’ity taom-pilalaovana ity”, hoy izy.
Mpilalao nanana ny lenta ambony tany Frantsa, i Nativel. Nitana ny laharana faha-237 maneran-tany izy ny volana janoary 2024 ary nahazo isa 45. Handray anjara avy hatrany amin’ny fifanintsanana hiadian-toerana amin’ny fifaninanam-pirenena frantsay “France Elite”, i Jonathan Nativel amin’ity, izay sady tafiditra amin’ny fanombohan’ny fiadiana ny ho tompondakan’i La Réunion, ny 1 febroary ho avy izao.
Tompondaka
French