Hantenaina hamirapiratra mandritra ny Fespaco, andiany faha-29, any Ouagadougou ny sarimihetsika malagasy. Nahatafiditra roa, amina sokajy samihafa mantsy ireo Malagasy mpanatontosa.
Mitohy ny lalan’ny “Sitabaomba”, horonantsary novokarin’i Lova Nantenaina. Anisan’ireo voafidy hifaninana mandritra ny “Festival Panafricain du cinéma et de la télévision de Ouagadougou”, na ny Fespaco, andiany faha-29, hotontosaina any an-drenivohitr’i Burkina Faso ity horontantsary malagasy ity. Ao amin’ny sokajy “Documentaire long métrage” no misy azy, milahatra amin’ireo 14 hafa, izay samy efa nanana ny lazany tamin’iny taona iny avokoa.
Nahatafiditra ny “Silence” an’i Medalys Anjarasoa ihany koa i Madagasikara, ao amin’ny sokajy “Animations”. 17 ny sarimiaina mifaninana aminy, kanefa anisan’ireo tsara toerana ny “Silence” na eo aza izany. Tsy nahatafiditra tamin’ ireo sokajy 6 hafa kosa isika, na dia tamin’ny sarimihetsika fohy izay efa voafehin’ireo Malagasy mpanatontosa aza.
Azo lazaina fa efa tsara anefa, satria iray fotsiny ny sarimihetsika malagasy voafidy hifaninana tamin’ny “Fespaco” farany teo. Roa fotsiny ihany koa no voafidy taty amin’ny faritry ny Ranomasimbe indianina tamin’izany, kanefa nahita 8 ireo mifaninana amin’ity. Anisan’izany ilay “Zanatany” notontosain’i Hachimiya Ahamada, avy atsy amin’ny Nosy Comores, izay mifaninana ao amin’ny sokajy sarimihetsika fohy. Ny lohateny no teny Malagasy, ary misy faka Malagasy ny tantara, saingy kaomaorianina ny mpanatontosa. Mbola mahakasika akaiky an’i Madagasikara koa ilay horonantsary «Nous Sommes Tous des Migrants», notontosainan’i Gopalene Parthiben Chellapermal, avy atsy amin’ny Nosy Maurice, mifaninana anatin’ny sokajy “Semaine de la critique”.
Miandrandra fandresena amin’ireo vokatra roa hifaninana ireo, hamirapiratan’ny sarimihetsika malagasy, mandritra ny “Fespaco” izay hotontosaina ny 22 febroary hatramin’ny 1 marsa ny rehetra. Sarimihetsika sy horonantsary ary sarimiaina miisa 1351, avy amina firenena 48 mantsy no voarain’ny komity mpikarakara hifaninana, ka ny 235 tamin’ireo ihany no notanana, izay notsinjaraina anaty sokajy 8. Marihina fa hetsika goavana ho an’ny sarimihetsika aty Afrika, fanao isaky ny roa taona any Ouagadougou ny Fespaco. Manokatra ny lalan’ireo mpanatontosa afrikanina sy ny sanganasany, any amin’ireo hetsika iraisam-pirenena hafa ihany koa ny fandraisana anjara amin’izany.
Zo ny Aina
French