Natomboka tamin’ny fomba ofisialy teny Tampoketsa, distrikan’Ankazobe, omaly, ny fambolen-kazon’ny minisiteran’ ny Foloalindahy.
Nandray anjara tamin’izany ny miaramila avy amin’ireo rantsamangaikan’ny minisitera, ny avy amin’ny zandarimariam-pirenena, notronin’ny avy ao amin’ny polisim-pirenena, ny mpiasa sivily ary ny attaché de défense ao amin’ny masoivohon’i Etazonia. Nitarika izany ny minisitry ny Foloalindahy (MFA), ny Jly Sahivelo Lala Monja Delphin, notronin’ny lehiben’ny etamazaoron’ireo Tafika, ny Jly Deramasinjaka Manantsoa Rakotoarivelo sy ireo mpiara-miasa aminy. Tonga nifanome tanana teny an-toerana koa ireo olom-boafidy sy olom-boatendry nahitana ny ben’ny Tanàna ary ny lehiben’ny distrikan’Ankazobe. Nohamafisin’ny MFA ny maha adidy masina ny fambolen-kazo, mitondra voka-tsoa ho an’ny firenena amin’ny lafiny maro. Antony, nisafidianana ny lohahevitra nentina nanatontosana izao fambolen-kazo izao : «Foloalindahy mamboly hazo, loharano angovo maharitra». Nambarany ny tokony hifanentanan’ny tsirairay amin’ny hikajiana ny ala efa misy ka tsy hikapa na handoro izany. Zanakazo 10 000 isa no nambolena tamina velaran-tany 500ha izay tafiditra amin’ny fanambin’ny MFA ny hamboly amina velaran-tany 10 000ha isan-taona. Eo koa ny fanambin’ny filoham-pirenena ny handrakotra ala indray an’i Madagasikara. Nikarakara ity hetsika ity ny talen’ny fiarovana eo anivon’ny MFA, tarihin’ny Capitaine de Vaisseau, Berarazana Patricio,
miantoka ny ao aloha sy mandritra ary ny fijerena ny fitomboan’ireo zanakazo aorian’ny fambolena azy.
Jean Claude
French