Ankoatra ny fihariana ara-toekarena, manana ny « Andraikitry ny orinasa amin’ny fiarahamonina » (RSE) ny Star. Anisan’izany ny fanampiana amin’ny fanabeazana ny ankizy anaty fianakaviana sahirana, nefa mahomby any am-pianarana. Misy ny fiaraha-miasany amin’ny Consulat de Monaco sy ny mpiara-miombon’antoka samihafa. Mitentina 10 tapitrisa Ar ny vatsim-pianarana natokana ho an’ny tanora miisa 6 mianadahy. Nahazo mari-pahaizana « licence » nandritra ny taom-pianarana 2023-2024 izy ireo. Mivelatra amin’ny làlam-pianarana samihafa, toy ny informatika, ny lalàna sy haipolitika, ny fitantanana, ny indostrian’ny fanodinana sakafo, ny fananganana fotodrafitrasa ary ny angovo azo havaozina.
Natolotra, omaly, ny mari-pankasitrahana noho ny fahombiazan’izy ireo, natrehin’ny kaonsila Monaco, Cyril Juge, ny talen’ny fandaharanasa Ramamonjisoa Adèle. Teo koa ny talen’ny serasera Star, Randriambolamanana Seheno sy ny tompon’andraikitry ny fifandraisana amin’ny any ivelany, Raveloarison Fanou ary ny solontenan’ny orinasa miisa 8 mpanohana.
Nanomboka ny taona 2014 ny Consulat Monaco no nanome vatsim-pianarana ny ankizy manomboka ny kilasy faharoa hatrany amin’ny fianarana ambony, toy izao. Mitotaly 1,455 miliara Ar ny vatsim-pianarana efa nomena, ho an’ny ankizy miisa 179, ka andiany fahadimy ireto farany ireto.
Njaka A.
French