Nivoaka amin’ny fahanginany ny mpanolotsain’ny Tanàna, Ravalolomanana Lalatiana, manoloana ny fitantanana ny Kaominina Antananarivo Renivohitra (CUA). Nambarany fa vonona hatrany ny tenany hijoro sy hitondra ny traikefany eto amin’ny tanàna. “Hipetraka ho ray aman-dreny sy hampita ny fahaiza-manao izahay. Efa nandalo fepotoam-piasana telo ka tsy mety ny mandray baiko fotsiny na koa hanohitra bontolo”, hoy izy, tetsy Analakely, omaly. Nanteriny fa na tokana aza izy, hiezaka hitondra ny traikefany sy hanompo ny mponina ary ny tanàna ahatongavana amin’ny “Antananarivo tsy maintsy mandroso”… Notanisainy fa niady amin’ny tsy fetezana tamin’ny fitantanana ny Tanàna, tamin’ireo mpitantana nifandimby ny tenany. Tanàna iaraha-manana ka aleo hapetraka ny adihevitra hanasoavana azy fa tsy ho mpanangan-tanana fotsiny, araka ny nambarany. Notsiahiviny fa anisan’ny niady fo izy tamin’ny famerenana ny tanin’ny CUA sy ny ady amin’ny kolikoly, niarahany tamin’ny ben’ny Tanàna teo aloha, Andriantsitohaina Naina. Nodiovina ny fitantanana samihafa sy ireo fitaleavana… Nahagaga azy anefa izao fa nofoanana ny vaomieran’ny ady amin’ny kolikoly eo anivon’ny CUA. Mavesatra koa anefa ny rafitra amin’izao fotoana izao. “Nametrahana ireo mpanohana fotsiny ireo toerana sasany ao fa tsy tena ilaina…”,
hoy izy. Notsindriny fa laviny rehefa hevitra rehetra tsy mahasoa ny CUA. Tsy mety koa anefa ny fanaovana politika mivadibadika…
Synèse R.
French