Maty notifirin’ny jiolahy teo amin’ny tendany Rasazy Narindra, izay vao lany ho ben’ny Tanàna raha avy namonjy ny fametahana ny sambohadiny. Voalaza fa vela-pandrika sy vono olona nomanina no nanjo azy, afakomaly tao Itremo.
Teny an-dalana avy namonjy ny nampisalorana azy ny samboady tao Ambositra, ny alakamisy 20 febroary teo, no lavo ny ben’ny Tanàna, Ranivoarivony Narindraniaina na Rasazy Narindra. Voalaza fa teo amin’ny 20 km miala ny kaominina ambanivohitra Itremo, anelanelan’Ambavalozakely sy Ankafotra no nitifiran’olon-tsy fantatra azy tao anatin’ny fiara nandehanany. Maty voatifitra avy hatrany teo amin’ny tendany ity ben’ny Tanàna ity, taorian’izay, araka ny fampitam-baovao avy amin’ny Prefektioran’Ambositra. Efa nidiny any an-toerana avy hatrany koa ny mpitandro filaminana eo anivon’ny CIRGN Fianarantsoa sy ny zandary eo anivon’ny faritra Amoron’i Mania ary ireo manam-pahefana any an-toerana.
Naneho fiaraha-miory ny minisitera mpiahy
Tsy niandry ela ny minisitera mpiahy. Naneho fiaraha-miory tanteraka amin’ny fianakavian’ny ben’ny Tanànan’ny kaominina Mangataboahangy, distrika Ambatofinandrahana, Ranivoarivony Narindraniaina ny minisitry ny Fitsinjaram-pahefana sy ny fanajariana ny tany (MFFT), Andriantsitohaina Naina. Nanteriny fa novonoina tamin’ny fomba feno herisetra sy habibiana izany mpitantana kaominina izany. “Manameloka tanteraka izao fihetsika mamoafady sy feno habibiana izao ny tenanay sy ny mpiara-miasa rehetra eto anivon’ny minisiteran’ny Fitsinjaram-pahefana sy ny fanajariana ny tany”, hoy izy. Nankahereziny koa ireo ben’ny Tanàna rehetra amin’ny asa sy ny adidy mavesatra miandry azy ireo.
Synèse R.
French