Dimy ireo jiolahy lavon’ny balan’ny polisy, tao anatin’ny hetsika hiadiana amin’ny fanafihana mitam-piadiana misesisesy teto Antananarivo. Efatra ireo azo sambo-belona hatramin’izao. Vehivavy rasazy, mipakaraka ireo jiolahy ny iray tamin’ireo. Efa saika mpamerin-keloka ary gadra efa nahavita ny saziny avokoa ireo jiolahy vaosambotra ireo, raha ny tatitra nataon’ny polisim-pirenena niarahan’ny DPJ, Sag ary ny BC etsy Anosy, ny zoma lasa teo. Anisan’izany i Stephano, jiolahy, maty nandritra ny fifanjevoana tetsy Ankazotoho ny talata alina teo. Jiolahy efa avy nigadra ary vao nahavita ny saziny, nivoaka ny fonjan’i Tsiafahy tamin’ny 2024 izy io. Nanenjehana azy tamin’izany, ny fanafihana mitam-piadiana mahery vaika. Nitohy ny fikarohana, tratra ny zoma teo ry Rafeno, maty voatifitra tetsy Ankadievo. Maty tetsy Andohatapenaka, i Bota, izay voatifitra tamin’ny fanafihana tetsy Analakely. Teo ihany koa ilay nilatsaka tao anaty rano tsikafona. Tratra nandritra izany koa ireo fitaovam-piadiana telo nampiasain’ireo jiolahy ireo: revolver iray, basy PA roa, niaraka tamin’ny bala calibre 12 maromaro.
Tambajotran-jiolahy efa enjana ary tsy misalasala mitifitra izy ireo. Anisan’ny fanafihana nataon’izy ireo, ny tranga tetsy Ambodivona, Soavimasoandro, Pavillon Analakely, Andohalo. Mbola maro ny karohina. “Nampiasa fitaovana sy teknolojia avo lenta ny avy amin’ny Sag sy BC nahafahana nanao ny fikarohana, toy ny camera de surveillance sy drone…”, hoy ny sefo BC, kaomisera, Ratsimbaharijao Rinah Nirina. Marihina fa vaosambotra ny zoma maraina teo tetsy Imerintsiatosika, ny lehilahy sakaizan’ilay rasazy, mpikarakara ireo jiolahy.
Mino
French