Tomponandraikitra. Nahoraka tamin’ny tambajotran-tserasera ny fiakaran’ny ranobe etsy sy eroa, saika manerana ny lafivalon’ny Nosy. Maro ny fotodrafitrasa dibo-drano sy simba, niteraka resabe sy fanakianana ny fitondram-panjakana izany. Dokotera aorian’ny fahavoazana hatrany anefa Ramalagasy. Tompondakan’ny fifanomezan-tsiny sy ny fanilihana andraikitra.
Raha misy ny voina, raha misy ny fahasimbana, mihazakazaka ny manampahefana, manilika amin’izatsy na amin’izaroa. Tsy misy manaiky ho diso. Zary mivadika ny rasa, aleo mitsabo toy izay misoroka. Ohatra ny mahafinaritra ny sasany ny mandany ny volam-bahoaka, ampiasain’ny fanjakana. Tena hoe manao izay danin’ny kibony amin’ny famoahana izay azo havoaka amin’ilay kitapom-bola.
Ny tena zava-doza, misy ireo mahay mila ranondranony ka mamadika ny fahavoazana hakany ny fon’ny tompon’ny lakile. Na efa anaty lavaka mangitsokitsoka aza dia mbola mahita hirika ihany, ilazana fa tsy marary ilay tanàna. Mbola mizahozaho ho tsy manana andraikitra na kely aza amin’ny fahalovana mahazo vahana eto amin’ny firenena. Misy ny mahay miala bala ara-bakiteny.
Tsy natao hahakivy anefa izany, mbola misy ny olom-banona, sahy mandray ny andraikiny. Vonona ny manitsy sy manarina rehefa misy ny tsy nety natao. Matetika miasa mangina sy anaty fahamarinana izy ireny kanefa takon’ny lainga tsara lahatra. Mbola misy ny olon-tsotra, misy ny manana andraikitra ambony. Mila fampirisihana izy ireny satria tsy ho maina ny vay raha tsy misy sahy manapotsitra.
Fotoan’ny fifaninanana masina izao, hoenti-manatsara ny eto an-tanàna. Fotoana hisehoan’ny tena tia tanindrazana fa tsy ireo mpanao fiavin’ny tafara. Miandrandra izany ny vahoaka malagasy tsivakivolo, tsy misy fahagagana izany akory! Mitaky asa amin-kitsim-po ho an’ny mpiray tanindrazana!
r.r
French