Nitrangana vaky trano indray tany amin’ny fokontany Analankinina Hopitalibe, parisela 12/21-22, zana-paritra fahefatra, ny sabotsy hifoha alahady teo. Vaky trano maromaro no niseho tao amin’io toerana io, raha ny fanazavana voaray avy amin’ny mponina any an-toerana. Amin’ny ankapobeny, tranona mpianatra ho mpitsabo mpanampy eny anivon’ny sekoly ambony avokoa ireo niharan’ny halatra ireo. Tao anaty torimaso lalina no niditra antsokosoko ireo jiolahy. Nanararaotra ny ora-mikija amin’ny andro alina, ka tsy nisy naheno ny fidiran’ireo olon-dratsy. Vokany, lasan’ireo jiolahy avokoa ny solosaina telo, tao amin’ireo trano miisa 12. Ankizy 12 mianadahy mpianatra no tompon’izy ireo. Lasan’ireo jiolahy ihany koa ireo finday, vilany ary fitaovam-pihinanana ary ny akanjo fitafy tsaratsara. Naparitak’ireo olon-dratsy tamin’ny tany avokoa ireo lamba tsy tiany. Marihina fa tsy nisy ny aina nafoy nandritra ny halatra.
Niharan’ny fitsaram-bahoaka ny lehilahy iray
Ankoatra izay, saron’ny fokonolona teny amin’ny Epp Analamboanio, ny lehilahy iray saika hangalatra moto. Vokany, niharan’ny fitsaram-bahoaka io olona io.
Efa teo am-pamatorana io mpangalatra io, ireo olona, no tonga ny mpitandro filaminana. Efa voatazona eny anivon’ny biraon’ny zandary izy io, hanaovana fanafihadiana.
Sajo/Mino
French