Lehilahy iray 22 taona, avy niandriaka no maty natelin’ny rano teny Andranoro, fokontany sy kaominina Antehiroka, distrika Ambohidratrimo, afakomaly tamin’ny 4 ora sy folo minitra tolakandro. Nitondra lakana hazo ary hamonjy fodiana hihazo ny trano fonenany izy tamin’io fotoana io. Niakatra sy somary nahery ny rano teny am-pandehanany ka nivadika ny lakana nentiny. Vokany, nilentika ary lasan’ny rano izy nandritra izany. Nampandre ny tomponandraikitra mahakasika ny zava-misy ny nahita ny tranga. Nidina tany an-toerana ny vondrona mpamonjy voina taorian’ny fandrenesana ny antso avy amin’ny olon-tsotra. Nanao ny fikarohana ilay niharam-boina niaraka tamin’ireo fokonolona izy ireo. Naharitra minitra maro ny fitadiavana io lehilahy io. Tamin’ny 5 ora sy 15 minitra kosa vao hita izy, izay vatana tsy niaina intsony avy ao anaty rano. Nentina teny anivon’ny hopitaly tao amin’ny CSB-II Ambohibao tamin’ny 5 ora sy 21 minitra hariva, mba ho zahan’ny mpitsabo ny razana. Tonga nijery ny zava-misy sy nanokatra ny fanadihadiana kosa ny avy amin’ny mpitandro filaminana eny an-toerana. Raha ny fanazavana voaray, efa voarara ny fandratoana eny amin’io toerana nitrangan’ny loza io, noho ny fiakaran’ny rano diso tafahoatra.
Mino
French