Fakana an-keriny : Olona sivy voasambotra, vehivavy mpampiantrano ny iray

Anisan’ny mampikaikaika sy mampanahy ny mponina ny trangana fakana an-keriny amin’ny faritra maro manerana ny Nosy.

Anisan’ny ahitana izany ny any amin’ny distrika Maevatanàna, Anjo­zo­robe, Ankazobe, sy ny maro hafa. Ho an’ny tany Maeva­tanàna manokana, olona sivy, malaza amin’ny fakana an-keriny no azo sambo-belona, afakomaly tamin’ny 8 ora sy sasany alina. Nahitana vehivavy mpampiantrano ny iray tamin’izy ireo, raha ny tatitra voaray avy amin’ny Com­mandant de groupement Be­tsi­boka. Tratra teny amin’ny lalana mankany amin’ny kaominina ambanivohitra Maro­talana, fokontany Antsiafa­bositra izy ireo, raha ny tatitra voaray hatrany.
Araka ny vaovao voaray avy amin’ny Compagnie An­kazobe mahakasika ny filazana fa hitan’ny olona mipetraka ao amin’ny tanàna iray any Befanoro, Fokontany Ambato­lampy, kaominina Ambani­vohitra Antsiafabositra, distrikan’i Maevatanana ireo dahalo misehatra amin’ny fakana an-keriny. Nidina tany an-toerana voalaza avy hatrany ny ekipan’ny Compagnie Maeva­tanàna, notarihin’ny lieutenant Randriamihoatra Hasinjatovo Hariniaina, nanao ny fanenjehana ireo olon-dratsy ireo. Afakomaly, tamin’ny 8 ora sasany alina, olona sivy voasambotra, vehivavy mpampianatrano ireo jiolahy ny iray tamin’izy ireo. Nihetsika aretina teny an-dalana ny iray antsoina hoe: Malamakely ka maty. Marihina fa dahalo nalaza tamin’ny resaka fakana an-keriny tany amin’ny faritra Maevatanàna, Andriamena, Ankazobe ary Anjozorobe ity jiolahy maty ity, raha ny tatitra voaray hatrany. Efa natolotra ny fianakaviany moa ny razana taorian’ny fizahana natao taminy. Mbola mitohy hatrany kosa ny fikarohana ireo jiolahy tafaporitsaka tao Maeva­ta­nàna. Nisy ny fiaraha-miasa teo amin’ny fokonolona nahafahana nanao ny fikarohana sy ny fisamborana ireo dahalo ireo. Entanina hatrany ny rehetra mba hampandre ny mpitandro filaminana rehefa maheno tranga na mahita dahalo mivezivezy amin’ny tanàna iray. Mba hahafahana misambotra azy ireo.

Mino