Fihaonana tamin’ny Antenimierandoholona: Mitaky ny hiarovana ny ainy ireo ben’ny Tanàna

Anisan’ny nisongadina ta­min’ny fihaonan’ny fikamba­nan’ny ben’ny Tanàna tamin’ny filohan’ny Antenimierando­holona ny hijerena manokana ireto mpitantana eny ifotony ireto. Maromaro ny fangata­han’izy ireo. Anisan’izany ny fanampiana tokony ho azo avy amin’ny fanjakana foibe. Ny momba ny tambin-karama raisin’ireo ben’ny Tanàna ary ny fiarovana ny ain’izy ireo eo am-panatanterahana ny asany. “Maniry koa izahay ny hahazoana ny mari-boninahi-pirenena rehefa mahavita soa aman-tsara ny fe-potoana fiasanay na raha sanatria tonga ny fahafatesana tampoka eo am-perinasa”, hoy izy ireo. Nanterin’ireo ben’ny Tanàna koa ny fikasan’izy ireo hanangana ny fikambanan’izy ireo manerana ny Nosy.
Naneho fahavononana hanome tantsoroka ireto mpitantana eny ifotony ireto ny eo anivon’ny Antenimierandoho­lona, tamin’ny alalan’ny filo­hany, ny Jly Ravalomanana Richard. Nambarany fa mie­zaka mifampiresaka mivantana sy mampita ny hetahetan’ireo ben’ny Tanàna, amin’ny fahefana mpanatanteraka, indrindra amin’ny minisiteran’ny Fitsinjaram-pahefana sy ny fanajariana ny tany ireo loholona, araka ny nambarany.
Natsidiny koa fa hampifandraisina mivantana amin’ireo kaominina any ivelany ny eto an-toerana. Tafiditra amin’ny diplaomasia parlemantera izany, araka ny nambarany.
Tsiahivina fa efa mitsan­gana ny fikambanan’ny ben’ny Tanàna isaky ny distrika amin’ izao fotoana izao.

Synèse R.