Votsotra teny an-tanan’ireo dahalo enin-dahy, nampiasa fitaovam-piadiana sy misaron-tava ny lehilahy 24 taona, mpiambina ny orinasa iray any Bemanevika, Bevondrona, fokontany Malamamaina, kaominina ambanivohitra Brieville, distrika Tsaratanàna, afakomaly tamin’ny 8 ora alina. Tafaporitsaka avokoa ireo dahalo enina voalaza ireo, nandritra ny fifanjevoana tamin’ny mpitandro filaminana tonga nandrava ny asa ratsiny tamin’io fotoana io. Marihina fa nalain’ny dahalo an-keriny sy nataon’izy ireo takalonaina, io mpiambina io. Nahazo antso avy amin’ny orinasa iray any an-toerana, mahakasika io tranga io, ireo mpitandro filaminana avy amin’ny Groupement Betsiboka, compagnie Andriamena sy ny Brigade Brieville. Dahalo miisa enina misaron-tava sy mitondra fitaovam-piadiana toy ny basim-borona ireo naka azy io an-keriny. Tsy niandry ela fa nidina nanao ny fanarahan-dia sy nanao ny fikarohana avy hatrany ny ekipa miisa 10, notarihin’ny GPCE Ramarampanarivo Heni Berto, Commandant de brigade Brieville taorian’ny antso. Naparitaka nanerana sy nanodidina ny toerana voalaza ireo fiara sy mpitandro filaminana mba hanao ny fikarohana. Niparitaka sy nikoropaka ireo olon-dratsy rehefa nahita ny fahatongavan’ny mpitandro filaminana. Raikitra ny fifanjevoana teo amin’ny roa tonta. Nanararaotra nitsoaka nandritra izany kosa, ilay mpiambina ny toerana nataon’izy ireo takalonaina, raha ny tatitra voaray avy amin’ny Commandant de groupement Betsiboka. Vokany, votsotra teny an-tanan’ireo olon-dratsy izy. Tafaporitsaka avokoa ireo dahalo enina voalaza ireo. Mbola mitohy ny fikarohana ireo olon-dratsy rehetra ireo amin’izao fotoana izao.
Mino
French