Nitrangana fanafihana tokantrano iray tetsy Ambodiafontsy Ampiatatafika, afakomaly tamin’ny 8 ora sasany alina. Jiolahy roa lahy tsy nisaron-tava no niditra an-keriny tao an-trano, ka nandroba ny entana sy namono ny tovolahy iray 18 taona.
Nitondra bar à mine ireo olon-dratsy, niditra nanainga moramora ny varavarana niditra ny trano. Fotoana tsy naha tao an-trano ireo ray aman-dreny izany ka nanararaotan’izy ireo niditra, raha ny angom-baovao vaoray. Mitentina 16 tapitrisa Ariary ny totalin’ny entana lasan’ireo jiolahy ireo tamin’izany. Anisan’izany ny moto, fahitalavitra écran plat ary solosaina. Naratra vokatry ny vono nahazo azy kosa ny tovolahy 18 taona nijanona tao ambany rihana, efitra nidiran’ireo olon-dratsy.
Tratran’izy ireo nijery fahitalavitra teo ambony seza fandraisam-bahiny, tao ambany rihana, io tovolahy io ka novonoin’izy ireo avy hatrany. Vokany, naratra mafy teo amin’ny lohany sy ny vavany ary ny vatany izy nandritra izany. Efa notsaboina eny anivon’ny hopitaly moa io zaza io taorian’ny tranga nahazo azy. Tany amin’ny efitra ambony rihana kosa ireo zanaky ny tompon-trano, roa vavy, izay naheno ny tabataba nisy tany ambany rihana. Nikasa hidina hijery ny zava-misy izy ireo ary nahita ireo olon-dratsy roa lahy.
Efa tsy tao intsony ny jiolahy 5 minitra taoriana
Niverina sy nanidy ny trano, ary niantso ireo ray aman-dreniny. Lasa nivoaka kosa ireo olon-dratsy. Efa tsy tao an-trano intsony ireo mpangalatra tamin’ny fotoana nahatongavan’ireo olon-dehibe tao an-trano. Tonga teny an-toerana ihany koa ny avy amin’ny zandary Faliarivo, Fenoarivo ary Ampitatafika dimy minitra taorian’ny fanafihana. Efa ao anatin’ny fikarohana ireo nahavanon-doza ny borigadin’ny zandary avy any Fenoarivo, izay miandraikitra ny tohin’ny raharaha.
Mino
French