Lehilahy iray, 24 taona, hita faty tany anaty ranovory, tany Ankadibe, fokontany Antanety, kaominina Ambanivohitra Ambatomirahavavy, distrikan’Arivonimamo, omaly maraina.
Naharay antso avy amin’ny olon-tsotra mahakasika io tranga io ny mpitandro filaminana avy amin’ny tobim-paritra Ambatomirahavavy, omaly tamin’ny 7 ora maraina. Nidina nijery ifotony ny zandary telo sy ny mpitsabo ao amin’ny CSB II Ambatomirahavavy ary ny sefo fokontany any an-toerana, taorian’izay. Tsy nahitana dian-kapoka na ratra, na vono teny amin’ny vatan’io lehilahy maty io fa nibontsina ny kibony ary nisy ra nivoaka ny vavany, raha ny fizahana nataon’ny mpitsabo. Mbola teny aminy avokoa ny akanjo nanaovany rehetra. Nahitana vatokely tao anaty paosiny, rehefa nosavaina. Lehilahy mbola tsy manambady, izay monina eny an-toerana ihany, izy io.
Nisotro toaka ary mamo
Nisotro toaka tao amin’ny karaoke vavahadin’Itasy, eo Ambatomirahavavy izy, ny zoma alina faha-28 febroary lasa teo. Hitan’ny olona fa tena mamo tanteraka izy tamin’izany, raha ny vaovao voaray hatrany. Tamin’io andro io ihany koa izy no hitan’ny fianakaviany farany.
Nanomboka nanao ny fikarohana azy io kosa ny fianakaviany rehefa tsy nahita azy nody tany an-trano. Omaly maraina kosa vao hita ny vata mangatsiakany.
Marihina fa sahabo ho 300m miala amin’ilay karaoke voalaza nisotroany toaka no nahitana ny razana. Taorian’ ny fizahana, natolotra ny fianakaviany ny razana. Nanaovana tatitra ny lehiben’ny fampanoavana Arivonimamo. Miandraikitra ny tohin’ny fanadihadiana kosa ny avy amin’ ny tobim-paritra Ambatomirahavavy.
Mino
French