Nampahatsiahy ny eo anivon’ny Transparency International Initiative Madagasikara (TI-IM) fa higadona afaka andro vitsy ny Andro iraisam-pirenena ho an’ny zon’ny vehivavy.
Nambaran’izy ireo fa marobe ireo sakana ho an’ny vehivavy eo amin’ny fandraisana andraikitra ara-politika. “Mbola vitsy anisa izy ireo eo amin’izany sehatra izany. 27 % monja ny tahan’izy ireo maneran-tany”, hoy ny TI-IM. Anisan’ny manamafy izany tsy fitoviana izany ny kolikoly amin’ny famatsiam-bola ara-politika, araka ny nambaran’izy ireo hatrany. “Mananosarotra ny fahazoan’izy ireo loharanom-bola sady mampiroborobo ny tambajotra misy fitanilana ho an’ny lehilahy”, hoy izy ireo. Nanterin’ny TI-IM fa vitsy kokoa ny vehivavy voafidy noho ny fifaninanana politika tsy ara-drariny any amin’ireo firenena ahitana kolikoly avo lenta na mamatsy vola ny antoko politika aza ny 70 % amin’ireny firenena ireny. “Mbola ny 17 % ihany anefa no manokana izany ho an’ny vehivavy, ka manakana ny fandraisany anjara feno amin’ny politika”, hoy ihany ny TI-IM.
Fanontaniana ho an’ny rehetra…
Notsindrin’izy ireo fa maro anisa ny vehivavy ka miantoka ny fanapahan-kevitra ny fisiany amin’ny sehatra politika ary maneho tsara kokoa ny filana sy ny ahiahin’ny fiarahamonina manontolo. Nanontany ireo rehetra afaka mamaly momba izany izy ireo.
“Ahoana ny hevitrao momba izany? Ahoana ny fijerinao ny fanamby raha toa ka eto Madagasikara no jerena?”, hoy ny fanontanian’ny TI-IM, natao hovaliana amin’ny rohin’izy ireo ary afaka ahitana ny salanisa mazava momba ny fandraisana anjara ny vehivavy eo amin’ny sehatra politika.
Synèse R.
French