Notontosaina teny amin’ny minisiteran’ny Foloalindahy (MFA), omaly, ny lanonana telo sosona ao anatin’ny fiaraha-miasa ara-tafika eo amin’i Madagasikara sy Chine amin’ny alalan’ny MFA sy ny masoivohon’i Chine eto Madagasikara. Voalohany, ny fitokanana ny trano fampianarana teny vahiny, indrindra ny teny “mandarin” eo anivon’ny sampandraharahan’ny serasera ao amin’ny MFA. Izao fanavaozana izao, natao hahafahan’ireo miaramila sy mpiasa sivily ao amin’ny minisitera mianatra teny vahiny, izay tsy azo ihodivirana amin’izao vanim-potoana izao. Faharoa, ny fanolorana ireo fitaovana ara-panatanjahantena ho an’ny Ofisy miaramila misahana ny fanatanjahantena sy ny kolontsaina (OMSC). Fahatelo, ny fanolorana tamin’ny fomba ofisialy ireo zavamaneno vaovao ho an’ny mpitsoka mozikan’ny Tafika Malagasy (MUSA). Nitokana izany fotodrafitrasa izany, ny MFA, ny Jly Sahivelo Lala Monja Delphin, sy ny masoivohon’ny Repoblika entim-bahoakan’i Chine eto Madagasikara, i Ji Ping, notronin’ny tomponandraikitry ny fiarovana eo anivon’ny masoivohon’i Chine, ny Kly Zhong Qiliang, ny talen’ny serasera, Andrianarisoa Bodo, miahy ity ivontoerana ity, ary ireo tomponandraikitra eo anivon’ny MFA sy ny Etamazaoro. “Manana ny lanjany manokana eo amin’ny fifandraisana amin’i Madagasikara sy i Chine izay firenena matanjaka sy manana ny maha izy azy eo amin’ny sehatra iraisam-pirenena”, hoy ny MFA nandritra ny lahateniny. Porofo mivaingana maneho ny fifandraisana matotra eo amin’i Madagasikara sy i Chine ny fahavitan’izao ivontoerana fampianarana teny sinoa izao, izay iaraha-miasa amin’ny foibe Confucius sy ireo fitaovana maro natolotra. Nanamafy kosa ny masoivohon’i Chine fa miroborobo hatrany ny fiaraha-miasan’i Madagasikara sy i Chine, indrindra taorian’ny fitsidihan’ny filoham-pirenena malagasy tany an-toerana ny taona 2024 sy ny fihaonan’ny minisitry ny Foloalindahy sy ny sinoa, ny septembre 2024 raha nanatrika ny forum Xiangshan ny MFA. “Vonona i Chine hiaraha-miasa hatrany amin’i Madagasikara mba hahafahan’ny Tafika Malagasy manatanteraka ny adidiny amin’ny fampandriana fahalemana sy fiarovana ny firenena”, hoy izy namarana ny lahateniny.
Jean Claude
French