Nanatrika ny fanombohan’ny fivorian’ireo mpikambana eo anivon’ny filankevitry ny mariboninahi-pirenena ny filoha Rajoelina Andry. Nisy hafatrafatra sy toromarika nomeny tamin’izany.
“Tsy omena fotsiny ny mariboninahi-pirenena, fa natokana ho an’ny olona tena nanao ny asany mivaingana sy azo tsapain-tanana ho an’ny firenena”. Io ny nambaran’ny filohan’ny Repoblika sady lehibe faratampon’ny mariboninahi-pirenena, Rajoelina Andry, tamin’ny fanombohana ny fivoriana voalohany, taona 2025, fanaon’ny filankevitry ny mariboninahi-pirenena teny amin’ny foiben-toerany, Antsakaviro, omaly. Hanatsarana ny fepetra sy ny fitsipika mifehy ny fanolorana mariboninahi-pirenena ny fivoriana.
Hanazava ny lalana ho an’ny taranaka fara mandimby izay voafantina hahazo mariboninahi-pirenena. Manome toromarika an’ireo mpikambana vaovao izy mba ho mari-pankasitrahana tokoa ho an’
ireo tena nanao ezaka ho an’ny tanindrazana no hotolorana an’izany. Manana anjara lehibe amin’ny fifantenana izay homena izany hanao tsaratsara kokoa ho an’ny firenena izy ireo. Mampirisika ny tsirairay hanao bebe kokoa hatrany amin’ny asa sy andraikitra sahaniny ho an’ny tanindrazana kosa ny fahazoana mariboninahitra, ary hery lehibe ho an’ny fianakaviana sy ny fiarahamonina misy azy ary ho amin’ny firenena manontolo.
Rafitra eo anivon’ny Prezidansa
Nisy ny fampahafantarana momba ny rafitra mariboninahi-pirenena. Rafitra eo anivon’ny fiadidiana ny Repoblika izay mandinika sy manapaka ny fanomezana mariboninahitra sy fampiakarana laharam-boninahitra ny filankevitra, izay feno 65 taona amin’ity taona ity. Mitarika azy ny lehiben’ny mariboninahi-pirenena, ny jeneraly Ranjeva Razanakombana Marcel. Nisy koa ny nampahafantarina tamin’ireo mpikambana vaovao 12 vao notendrena tamin’ny 24 janoary lasa teo. Teo koa ny fanolorana ny filohan’ny Repoblika ny medaly ho mariky ny fanajana sy ny hasin’ny mariboninahi-pirenena.
R. Nd.
French