Jiolahy mitam-piadiana iray lavon’ny balan’ny Sag nandritra ny fifanjevoana teo amin’ny polisy sy ireo olon-dratsy miisa efatra tetsy Anosibe. Tratra niaraka taminy ny basy kilalao iray sy bala miisa efatra. Raha toa ka tafatsoaka ireo namany telo hafa.
Nirefodrefotra ny basy tetsy Anosibe, afakomaly alina. Nifanehitra tamin’ny polisy ny andian-jiolahy miisa efatra, izay fantatra sy malaza amin’ny asa fanendahana sy fanafihana mitam-piadiana eny amin’ny faritry ny Trano dimy Anosibe sy Ampangabe iny. Efa nihatrana teny an-toerana ireo polisy manao fanamiana sivily. Nitifitra avy hatrany ireo olon-dratsy ireo vantany vao nahita ny mpitandro filaminana. Raikitra, araka izany, ny fifanjevoana teo amin’ny roa tonta. Vokany, lavo nandritra izany ny iray tamin’ireo olon-dratsy, raha toa ka tafaporitsaka namakivaky ny alina kosa ireo namany telo hafa.
Anisan’ny faritra ahenoana trangana fanafihana matetika eny amin’ny manodidina eny. Nitaraina ny mponina mahakasika ny tranga ka antony nahatonga ny polisy nanao ny fikarohana sy fidinana teny an-toerana. Fantatra fa efa niomana sy eo am-pikononkononana hanafika ireto jiolahy ireto. Niatrana sy niandry teny an-toerana ny polisin’ny Sag (Service anti-gang) nanao fanamiana sivily.
Rehefa nosavaina ity lavo ity, nahitana basy kilalao iray, entin’izy ireo mampihorohoro ny mponina tany aminy. Nahitana bala tena izy miisa efatra ihany koa niaraka tamin’izany. Mbola mikaroka ireo namany tafatsoaka kosa ny eo anivon’ ny polisin’ny Sag. Manentana ny olom-pirenena tsirairay izy ireo mba hanome loharanom-baovao sy hampita izany avy hatrany raha maheno tranga na mahita ireo jiolahy.
Mino
French