Eny amin’ny ny CCI Ivato no handraisana ny fihaonana an-tampon’ny filoham-panjakana eo anivon’ny Vaomieran’ny ranomasimbe Indianina (COI) faha-5. Vonona i Madagasikara.
Tsy any Nosy Be Hell-Ville indray… Eny amin’ ny ny CCI Ivato no handraisan’i Madagasikara ny fihaonana an-tampon’ny filoham-panjakana mpikambana eo anivon’ny Vaomieran’ny ranomasimbe Indianina (COI) faha-5, amin’ny 24 avrily ho avy izao. Fantatra io tamin’ny fampahafantarana ny sary famantarana ny fihaonana an-tampony teny Anosy, omaly. Noho ny lafiny toetr’andro no antony, araka ny fanazavan’ny tale jeneralin’ny minisiteran’ny Raharaham-bahiny, Rahajarizafy Lanto. Miara-miasa amin’ny fikarakarana ny fiadidiana ny Repoblika sy ny minisitera rehetra voakasika. Misy ny fiaraha-mientana amin’izany. I Madagasikara no mandray ny fihaonana an-tampony, i Madagasikara manontolo no manomana. Efa nilaza ny hahatongavany ireo fitondram-panjakana eo anivon’ny COI: i Seychelles, i Frantsa amin’ny alalan’i La Réunion, i Comore, i Maurice, i Madagasikara. Efa fantatra amin’ny fomba tsy ofisialy ny hahatongavan’izy ireo avy. Mbola hanamafy an’izay izy ireo amin’ny fomba ofisialy.
Anisan’ny hodinihina amin’ ny fihaonana ny amin’ny fiovaovan’ny toetr’andro, ny fahaleovantena amin’ny sakafo, ny fivoarana indrindra eo amin’ny angovo, raha ny fanazavan’ny talen’ny serasera eo anivon’ny fiadidiana ny Repoblika, Ratsirahonana Mercédès. Mamaritra ny politika ankapoben’ny fitondram-panjakana malagasy rahateo ireo. Zava-dehibe ny fiaraha-mientana sy ny fiaraha-miasan’ireo Nosy mpikambana eo anivon’ny COI. Anisan’ny mampiavaka an’i Madagasikara ny fikarakarana fihaonana an-tampony toy izao. Araka ny hafatry ny filohan’ny Repoblika, Rajoelina Andry: tsy maintsy atao ny fomba rehetra hahafantaran’ny manodidina an’i Madagasikara ny fahaizan’ny Malagasy mandray vahiny.
R. Nd.
French