Depiote Andriamampandry Todisoa : “Tsy maintsy miteny ny mpanohitra”

“Tadiavina hofongorina ny fanoherana eto Madagasi­ka­ra. Hamerina fitondrana jadona izany no misy? Efa ao anatin’ny demokrasia izao, fahafahan’ny olona ny miteny. Tsy maintsy miteny sy maneho ny heviny ny mpanohitra”. Io ny fanehoan-kevitry ny depiote Tim eo anivon’ny vondrona Fi­raisankina voafidy tao Antana­narivo VI, Andriamampandry Todisoa, momba ny anjara toeran’ny mpanohitra eo amin’ ny raharaham-pirenena. Tsy misy afa-kamongotra ny mpanohitra izany. Tsy fanjakana tan-dalàna ny firenena iray raha tsy misy ny fanoherana. Tokony hisaotra ny mpanohitra aza ny mpitondra amin’izao fotoana izao, fa miteny sy manitsy ary mandroso sosokevitra.
Ny mahavoa ny firenena amin’izao ary mahatonga an’i Madagasikara hihemotra: ny an’ny mpitondra ihany no atao, fa tsy mihaino mpanohitra. Nefa samy Malagasy, tokony hifampihaino. Tsy tokony hatao ny hoe fahavalo rehefa tsy mitovy hevitra amin’ny tena. Ny fahantrana no fahavalo iombonana. Izay no tokony hataon’ny mpitondra an-tsaina sy ho lesona. “Raha izaho izao, tsy manana fahavalo na iza na iza: na mpitondra, na izay tsy mitovy hevitra amiko aza”, hoy izy. Harena aza ny tsy fitovian-kevitra mba hahazoana mitady marimaritra iraisana ho amin’ny tombontsoam-pirenena. Tokony hifampihaino sy hifanitsy izany… Izay hampandroso ny Malaga­sy no tokony hatao, fa tsy hifanenjika an-toerana.

R. Nd.