Hamaritra ny hoavin’ny fandraharahana ireo paikady mifanaraka amin’ny fanabeazana ara-bola. Io ny lohahevitry ny hetsika « Espace jeune entrepreneur (EJE) » andiany faha-13 amin’ity taona ity.
Miantoka ny fampanana asa maharitra ny sehatry ny fandraharahana. Antony hametrahana ireo paikady mahomby rehetra ho ivon’ny hetsika “Espace jeune entrepreneur (EJE)”, andiany faha-13, ny 21 sy 22 marsa, eny amin’ny QG Tanora Ankorondrano. Hampahafantatra ny tontolon’ny fandraharahana, ny famolavolana tetikasa, ireo mpisehatra manampy amin’ny fanatanterahana izany ary ny fanabezana ara-bola ny Club Entrepreneurs étudiants du rendez-vous des entrepreneurs (CEERE), mpikarakara ny hetsika. « Hivoitra amin’ity andiany ity ireo tosika hanampiana ny tanora te hisehatra amin’ny fandraharahana », hoy ny tomponandraikitry ny EJE, Fitahiana Harinomena, omaly. Hozaraina amin’ireo mpandray anjara ny hetsika ny rafitry ny fandraharahana. « Mazàna sakana ho an’ny tanora maniry handraharaha ny olana ara-bola, ny tsy fahasahiana. Eo koa ny tsy fahampian’ny fahalalana momba ny tontolo. Hanome valiny sy hitondra vahaolana mahakasika ireo rehetra ireo ny EJE », hoy ny tomponandraikitry ny Valiha sady mpiara-miombon’antoka amin’ny EJE, andiany faha-13, Raboanary Tantely.
Tohana
Manampy amin’ny fizakan-tenan’ny tanora ny sehatry ny fandraharahana. Manome fahalalana feno mahakasika ny tontolo ny minisiteran’ny Tanora sy ny fanatanjahantena (MJS) hanohanana ny tanora. « Manodidina ny 300 000-500 000 isan-taona ny tanora tokony hiditra eo amin’ny sehatry ny asa saingy tsy ampy ny asa eto Madagasikara », hoy ny talen’ny fandraharahana sy ny asa eo anivon’ny minisitera, Aboubakary Alain. Notohizany fa maro ireo mpiara-miombon’antoka miara-miasa amin’ny minisitera. Misy, araka izany, ny antso an-tetikasa ataony isan-taona hanohanana tetikasa mendrika aorian’ny fifantenana atao.
Henintsoa Hani
French