Fanotofana tany tsy ara-dalàna : Mitohy ny hetsiky ny borigady manokan’ny MFFT

Nanamafy ny hetsika efa nataony ny eo anivon’ny minisiteran’ny Fitsinjaram-pahefana sy ny fanajariana ny tany (MFFT). Tsy handefitra amin’ny tsy fanarahan-dalàna ny eo anivon’ny borigady manokana ao amin’ny minisitera.

Hiara-kiasa amin’ny Api­pa ity sampana manokana ity ary hijery sy hanara-maso ny fampanajana ny fenitra eo amin’ny fanorenana sy ny fanajariana an-tanàn-dehibe. Anisan’izany koa ny ady atao amin’ireo mpanototra tany tsy ara-dalàna sy ireo nanao fanorenana, tsy araka ny fenitra koa. “Ani­san’ny mahatonga ny hamafin’ny fiakaran’ny rano sy ny tondradrano izany. Tsy maintsy harovana koa anefa ny fo­todrafitrasa samihafa”, hoy ny eo anivon’ny MFFT sy ireo avy amin’ny borigady manokana hanara-maso izany.
Anisan’ny faritra tena ifantohana sy iasan’izy ireo amin’izany ny eny By-Pass “Boule­vard de Tokyo” sy ny eny amin’ny “Rocade Est et Nord-Est”. Eo koa ny eny amin’ny “Voies rapides” sy ny antsoina hoe “Route Bretelle”.

Fanorenana tsy ara-dalàna…
Anisan’ny asan’izy ireo amin’izany ny mijery ireo fanorenana tsy ara-dalàna ka ma­nelingelina ny fijoroan’ireo fotodrafitrasa samihafa. Eo koa ny fitakiana ny fanamarinana ny maha ara-dalàna na tsia ny fanorenana sy ireo fa­notofana tany natao.
Manampy izany ny fiaraha-miasa sy ny fandrindran’ity borigady manokana ity amin’ny asan’ny Apipa amin’ny fiomanana sy fisorohana ny tondradrano.
Tsiahivina fa eo ambany fiahian’ny eo anivon’ny MFFT izany borigady manokana izany ary miara-miasa amin’ny polisin’ny fanajariana ny tany sy ny misahana ny fanotofana ta­ny. Manohana ara-teknika azy ireo amin’izany koa ny Apipa, hisorohana ny tondradrano.

Synèse R.