Nandray ny toerany maha tale jeneralin’ny Serasera, eo anivon’ny minisiteran’ny Serasera sy ny kolontsaina, azy i Botomiarana Donald Judicaël Tavao, omaly. Natao tetsy Anosy ny fifamindram-pitantanana teo aminy sy ny tale jeneraly teo aloha, Ratrimonirina Elias. “Tsy mora ny asa saingy olon’ny serasera isika ka misokatra”, hoy izy.
Nambaran’ny depiote Raholdina Naivo fa tsy mivadika ny TGV ary tsy hivadika amin’ny filoha Rajoelina Andry. “Maherin’ny 70% ireo TGV nanohana anao Ben’ny Tanàna Ramanantsoa Harilala tamin’ny fifidianana”, hoy izy. Niara-nivory avokoa ireo departemantan’ny TGV boriborintany enina tamin’izao fanehoan-keviny izao.
Noraisin’ny masoivohon’i Madagasikara any Washington D.C, Rakotomalala Lantosoa, ireo vehivavy delegasiona miatrika ny fihaonana an-tampony momba ny fitovian-jo natao tany New York, ny 17 marsa teo. Teo ny minisitra isany Razafinjato Aurélie sy Stephanie Delmotte, ny loholona Ramarosoa Émeline. Voaresaka ny fiaraha-miasa eo amin’ny rehetra.
Nandray ireo solontenan’ny depiote ny minisitry ny Fitsarana, Rakotomandimby Benjamin Alexis, afakomaly. Nihaino ny hetahetan’ireo solombavambahoaka ny minisitra ary nanambara fa anisan’ny ezaka iraisana ny ady amin’ny kolikoly sy ny fanatsarana ny asa, toy ny fandraharahana ny fonja.
French