Hita amin’ny sehatra maro ireo ankizy miasa nefa tsy ampy taona. Voararan’ny lalàna anefa. Izany indrindra no handrafetana ny paikady nasionaly 2025-2040 hiadiana amin’ny fampiasana ankizy.
Tanterahina ao Matsiatra Ambony ny atrikasa fakan-kevitra ho fandrafetana ny drafitra nasionaly mahakasika ny ady atao
amin’ny fampiasana ankizy ho an’ny taona 2025-2040, izay naharitra efatr’andro. Voakasiky ny atrikasa ny drafitra apetraka ho an’ny faritra Matsiatra Ambony, Amoron’i Mania, Ihorombe, Itasy, Bongolava, Vakinankaratra ary Analamanga.
Tanjona ny hahafahana mametraka paikady mahomby sy matotra hiadiana amin’ny fampiasana kilonga, fa indrindra ihany koa ny fakan-kevitra iraisana sy eken’ny rehetra isam-paritra.
Ny famolavolana ity drafitra nasionaly ity dia vokatry ny fahavononana ara-politika sy ny fiaraha-miasa akaiky sy mirindra eo amin’ireo mpisehatra rehetra. Mifanaraka tanteraka amin’ny politika ankapoben’ny fanjakana mahakasika ny loharanon-karena mifototra amin’ny maha olona izay misy sehatra maro, toy ny fanabeazana, ny fahasalamana, ny fiarovana ara-tsosialy.
Eto Madagasikara, misy ny ezaka amin’ny ady amin’ny fampiasana ankizy saingy mbola maro koa ireo sahy manohitra izany ary miseholany eny anivon’ny fiarahamonina mihitsy aza.
Maro ireo ray aman-dreny any ambanivohitra mandefa ny zanany aty an-tanàn-dehibe hitady vola amin’ny asa an-trano. Ny ankizy sasany alefa hitrandraka harena an-kibon’ny tany…. Misy aza amin’ny faritra sasany misehatra amin’ny asa mamoafady ny ankizy, indrindra ny vavikely.
Ireo tomponandraikitra eny ifotony no mahita ny paikady hisorohana izany ka anaovana fakan-kevitra hahafahana mandrafitra ny paikady izay mety hifanaraka amin’ny faritra tsirairay.
Tatiana A
French