Manana isa 10 ao amin’ny vondrona “I” izao ny Barea de Madagascar, amin’ity fifanintsanan’ny “Mondial 2026” ity. Fanamby lehibe ho an’i Corentin Martins, mpanazatra Barea ny fifanandrinana amin’ny Black Star Ghana.
Tsara fanombohana tokoa ny fitantanan’i Corentin Martins, mpanazatra ny Barea. Nandresy ny Les Fauves Centrafrique, 4 no ho 1, ny ekipa nasionaly malagasy, afakomaly, tany Maroc. « Hampiseho lalao mendrika no ho ireny izahay rehefa mifandona amin’i Ghana », hoy ity teknisianina ity.
Tsiahivina fa hifandona amin’ny Black Star Ghana, ny Barea, ny alatsinainy ho avy izao, any Maroc ihany. Nilaza ny mpanazatra Barea, fa manana fotoana tsara amin’izay izy ireo hanomanana io lalao ho avy io. Raha ny fanazavana, tsy nanana afa-tsy andro roa fotsiny ihany izy ireo nahafahana nanomana ny fihaonana tamin’i Centrafrique.
“Faly tanteraka tamin’ny zava-bitan’ireo Malagasy mpilalao ny tenako”. Hevitr’ity teknisianina ity.
Tsara ny mampahafantatra fa mitarika eo amin’ny laharana voalohany vonjimaika ao amin’ny vondrona “I”, ny Barea saingy mety hiova io filaharana io taorian’ny fihaonan’i Comores sy Mali, halina. “Hiezaka ny handresy hatrany izahay, saingy tsarovy fa ekipa efa manana ny lazany eto Afrika i Ghana ary saika milalao any Eoropa avokoa izy ireo. Manana mpilalao tsara isika ary izy ireo ihany no hampiseho ny fahaiza-manaony”. hoy i Corentin Martins.
Ampahatsiahivina ihany, raha mandresy an’i Ghana ny ekipam-pirenena malagasy, efa azo antoka tsara ny handraisan’ny Barea anjara amin’ny fiadiana ny ho tompondaka maneran-tany izay hatao any Meksika sy Etazonia, ny taona 2026 ho avy io.
Fitia Randria
French