Anisan’ny nankatoavin’ny filankevitry ny minisitra teny Iavoloha, afakomaly, ny momba ny fampandrosoana eny ifotony. Anisan’izany ny faritra 23, eo ambany fiahian’ny minisiteran’ny Fitsinjaram-pahefana sy ny fanajariana ny tany (MFFT).
Nivoitra tamin’izany ny momba ny tetibolan’
ireo faritra amin’ny alalan’ny Tahirimbola ho an’ny fampandrosoana ifotony (FDL). “Hisy ny fanomezana fitaovana ireo faritra ho fanatsarana ny toe-piainan’ny mponina sy ho fampiroboroboana ny toekarena”, hoy ny tatitra. Hoentina hanamboarana ireo lalana sy fotodrafitrasa samihafa izany fitaovana izany. Ho avy ihany koa ny tetibola natokana isaky ny faritra. Tsy maintsy voafaritry ny faritra tsirairay mazava tsara ao anatin’ny fifanarahana famatsiam-bola ireo asa ampiasana izany tetibola izany. “Hisy ny fanaraha-maso hentitra ny fanatanterahana ireo asa rehetra”, hoy ny tatitra.
Etsy andaniny, mitohy hatrany ny fanatsarana ny fitantanana ny tanàn-dehibe, amin’ny alalan’ny firosoana amin’ny fampiasana ny “Matac” sy ny “Digitalisation” ho an’ny fahazoan-dalana hanorina. Hisitraka fiofanana momba izany ireo kaominina miisa 38.
Anisan’ny efa nahavita ny eny Ankadikely Ilafy, Ambohidratrimo, Talatamaty, Itaosy, Sabotsy Namehana. Anjaran’ ny teny Alasora ny tamin’ity herinandro ity. Hanamora ho an’ireo mila raharaha eny anivon’ny kaominina ny “Matac II”. Ahafahana manaraka akaiky ireo antontan-taratasy ho an’ireo fanorenana eny ifotony. Manamora kokoa ny fikirakirana ny dosie sy ireo dingana samihafa arahana mba tsy hampivezivezy ireo mila raharaha koa. “Azo atao amin’ny telefaonina ny fangatahana na koa amin’ny alalan’ny ordinatera…”, hoy ny tomponandraikitra.
Mora kokoa ny fanarahana ireo dosie
Tsiahivina fa iarahana amin’ny MFFT, amin’ny alalan’ny “Observatoire du Territoire” sy ny sampandraharaha-paritra ho an’ny fitsinjaram-pahefana sy ny fanajariana ny tany (Srat) izany tetikasa “Matac II” izany. Eo koa ireo avy amin’ny “Délégations locales de l’aménagement du territoire – DLAT”. Manohana izany kosa ny fandaharanasa Produir.
Synèse R.
French