Fifaninanana « Rallye des industries »: Hamelona ny fitiavan’ny tanora ny indostria malagasy

Hamoaka tanora tompondaka amin’ny fahalalana ny tontolon’ny indostria malagasy ny fifaninanana « Rallye des industries». Hetsika hanandratana avo ny fahalalan’ny tanora ny vokatra malagasy sy ny fandraisany anjara amin’ ny fampandrosoana ny toekarena.

Hisokatra manomboka ny volana jona ny fisoratana anarana ho an’ ny fifaninanana « Rallye des industries », andiany voalohany, karakarain’ny Sendikan’ny indostria eto Madagasikara (SIM). Fifaninanana natokana ho an’ireo mpianatry ny Oni­versite tsy miankina miisa 10 eto Antananarivo. Tanjona ny hanandratana avo ny indostria malagasy sy hampahafanta­rana ireo vokatra eto an-toe­rana ary hampiroboroboana izany eny anivon’ny mpiray tanindrazana. Hisongadina ao anatin’ny fifaninanana ny anjara toeran’ny indostria malagasy amin’ny fampandro­soana ny toekarena. Noho izany, tosika hampirisihana ny tanora hamelona ny fitiavana ny vokatra avy eto an-toerana sy hampifandray azy ireo mivantana amin’ireo mpikambana ny SIM izany.

Dingana

Hisy karazany efatra ny dingan’ny fifaninanana. Hiba­hana ny « Rallye cognitif » momba ny fahalalana ankapobeny momba ny indostria ma­la­gasy. Hanaovana tombana ny fitadidiana, ny fisainana ary ny fahafantarana ny lokanadin’ ny indostria eto an-toerana. Manaraka izany ny « Rallye pratique » hametrahana ireo fanambin’ny indostria. Andra­sana amin’ireo mpifaninana ny hitondrany vahaolana ma­noloana ny zava-misy. Hifan­toka amin’ny fampahafanta­rana akora fototra, ny vokatra azo ary ny fomba namolavo­lana izany kosa ny « Rallye sensoriel ». Raha toa ka ha­molavola tetikasa miavaka sy ny fanatanterahana izany ary ny hametraka ny tataom-bidy ara-toekarena kosa ny dingan’ ny « Rallye créatif ».
Ahitana mpikambana mi­isa telo ny ekipa iray. « Ny mpi­kambana ao amin’ny Sim kosa no mpiahy ny ekipa tsirairay sy hizara amin’izy ireo ny fahalalana rehetra momba ny indostria sy torohevitra samihafa », hoy ny mpitantana ny Mercatis, Andriamijoro Mino. Notohizan’ny filohan’ny Sim, Rasamimanana Tiana, fa paikady hampahafantarana eny ifotony fa tsara kalitao ny vokatra malagasy ny tanjon’ny fifaninanana. Ampisehoana ihany koa fa manaraka ny toetr’ andro sy avo lenta tanteraka ny fitaovana ampiasain’ireo indostria eto amintsika.

Henintsoa Hani