Sanatrian’ny vava tsy mahita afa-tsy toe-javatra miiba, fa tsy azo atao ny miray tsikombakomba amin’ny ratsy! Andao hiresaka momba ny tsy fandriampahalemana, anio. Trangam-piarahamonina maro no miseholany etsy sy eroa. Tsy vitan’ny mampihorohoro fa tena maharikoriko. Ny fiarahamonina iray manontolo no mamohehatra.
Tsy fotoan’ny fifanomezan-tsiny sy fifampiampangana, na fifanilihana andraikitra koa izao vanim-potoana izao. Fotoan’ny fitadiavam-bahaolana iraisana sy mahakasika ny sokajy rehetra izao. Tsy mila mizaha satam-piarahamonina na laharam-boninahitra araka ny asa, fa vanim-potoana hiarahan’ny rehetra mirona. Mamongotra ny ratsy.
Tsy afaka ny hialangalana ny mponina eny ifotony, izay sady lasibatra no tompon’antoka ihany koa. Tsy hay na noho ny tahotra na ilay efa manana kolontsaina misara-bazana fa dia mitazam-potsiny ny jiolahy. Mamela azy ireny hiriaria sy hanao izay danin’ny kibony. Baikoin’ilay fisainana ory hava-manana ve? Sa dia efa eny an-tampon’ny samy reraka ka manao izay hanavotany ny tenany ny tsirairay?
Sarotra ho an’ny mpitandro filaminana ny hanenjika ny olon-dratsy raha mbola mikombom-bava ny mpiray tanàna. Tsy misy mahalala izay vandana mihoatra ny mpiara-monina. Indrisy anefa, mivadika ny rasa. Mimenomenona sy manome tsiny no betsaka. Raha misy aza ny mpitandro filaminana mba maniry ny hiasa dia mailaka ny mpamadi-dresaka. Mitati-bolana, mandoto izay te handeha mahitsy sy vonona hiasa.
Raha fehezina ny raharaha, sarotra ny famongorana ny tsy fandriampahalemana eto Madagasikara. Mifamahofaho ny antony mahatonga izany, fa mbola manjavozavo ihany koa ny paikady hoenti-mamongotra azy.
r.r
French