« Zava-dehibe ny fiaraha-miasa amin’ny tanora satria ny tanora rahateo no hoavin’ny firenena indrindra eo amin’ ny lafiny fandraharahana », hoy ny fanazavan’ny filohan’ny Antenimieran’ny varotra sy ny indostria eto Antananarivo, Gil Razafintsalama (CCIA). Tontosa teny amin’ny Antenimieran’ny varotra sy ny indostria Analakely, ny alakamisy lasa teo, ny fifanaovan-tsonia fiaraha-miasa eo amin’ny Jeune chambre internationale madagascar (JCIM), Jeune chambre internationale Antananarivo sy ny Jeune chambre internationale Iarivo, niaraka tamin’ireo mpiara-miombon’antoka mitovy fomba fijery amin’izy ireo. Tonga nanatrika ity fifanaovan-tsonia ity ny filoha lefitra iraisam-pirenena ny JCI, Ahmadou Abdoulaye Traoré. Niorina tany amin’ny taona 1910 ny JCI fa ny 13 oktobra 1915 kosa vao tena nisokatra tamin’ny fomba ofisialy izany. Nambaran’ny filohan’ny CCIA hatrany fa manome sehatra mivantana ireo tanora eo amin’ny fandraharahana izy ireo. Nilaza kosa ny JCI fa vonona hitondra ny anjara birikiny eo amin’ny sehatry ny fandraharahana. «Nisy ny fomba fijery mitovy eo amin’ny sehatry ny fampandrosoana ny firenena sy ny tanora ka antona nahatonga ny fifanaovan-tsonia», hoy ny fanazavan’ny filohan’ny JCI Antananarivo, Solange Raharimanantsoa. Nisy, araka izany, ny fifaraham-piaraha-miasa tamin’ireo mpiara-miombon’ antoka, nahitana ny Maison de l’entrepreunariat, 24/24. MG sy ny Sioka. Marihina fa ny JCI Antananarivo dia miara-miasa amin’ny any ivelany, toy ny JCE Grand Sud de La Réunion, ny JCE Abomey Calavi Lincoln Benin ary ny JCI Maurice.
Jean Claude
French