Misesisesy ny fahafatesan’olona mampiahiahy sy feno habibiana tato ho ato. Raim-pianakaviana iray hita faty notapahan-doha, omaly. Avy nivarotra sakay tany Antsirabe izy io ary taraiky hariva teny an-dalana ka izao nisy namono izao.
Raim-pianakaviana iray, 68 taona, hita faty tapa-doha, omaly vao maraina, tamin’ny lalana mankany amin’ny tanànan’Antompombohitra, fokontany soavina faharoa, kaominina Antohobe, distrikan’i Betafo, faritra Vakinankaratra. Mpitondra sarety handeha hikarakara vary vao maraina no nahita faty nivalampatra tamin’ny lalana ka niantso ny tomponandraikitra avy hatrany. Nidina nijery ny zava-misy ny zandary avy any Betafo sy ny mpitsabo any an-toerana vantany vao naheno ny tranga. Efa eny anivon’ny fianakaviana ny razana taorian’ny fizahana nataon’ny mpitsabo. Nikaroka ny lohan’ilay raim-pianakaviana hita faty io ireo mpitandro filaminana sy ny fokonolona tany an-toerana hatramin’ny omaly hariva fa mbola tsy nahitam-bokany, raha ny angom-baovao. Hotohizana hatrany ny fikarohana sy ny fanadihadiana ataon’ny mpitandro filaminana. Indrindra ny fikarohana ireo nahavanon-doza amin’izao vono olona feno habibiana izao.
Nifampiantso tamin’ny finday izy sy ny rahalahiny
Nifampiantso tamin’ny alalan’ny finday taminy ny rahalahin’io raim-pianakaviana hita faty io afakomaly tamin’ny 6 ora sy fahefany hariva. Nifampiresaka mahakasika ny fambolena izy ireo tamin’izany. Mbola teny am-pandehanana tongotra moa io rangahy maty io ka tsy sahy niresaka betsaka firy, raha ny vaovao voaray. Nilaza fa hiantso izy io rehefa tonga any an-tanàna nefa tsy nandeha intsony ny findainy rehefa nantsoina. Hatairana ny nahenoana sy nahitana azy hita faty tapa-doha. Mpivarotra sakay ary mitondra entana mankany Antsirabe isaky ny alatsinainy io raim-pianakaviana io, raha ny fanazavana voaray. An-dalana hamonjy fodiana tamin’ny lalana manakaiky ny tranony izy io tamin’ny 7 ora latsaka fahefany hariva tany ho any.
Ankoatra izay, nahitana fatin-dehilahy iray ihany koa tetsy Ilazana, Morarano, Ambohimanambola, afakomaly. Tsy fantatra mazava ny antony nahafaty ity lehilahy ity. Misahana ity raharaha iray ity ny avy amin’ny Zandarimaria Ambohimanambola.
Mino
French