Miditra tsikelikely amin’ny fandaminana ny tsena eto Antananarivo ny Kaominina Antananarivo Renivohitra, tarihin’ny ben’ny Tanàna Ramanantsoa Harilala.
Nanomboka ny faran’ny herinandro teo ny fanesorana ireo mpivarotra amoron-dalàna, efa nifampiresahana sy nifanaiky fa amin’ny fandaminana ho atao ary nanaiky ho afindra amin’ny toeran-kafa.
Hanomboka amin’ny volana mey ny tetikasa lehibe roa eto Antananarivo dia ny fanamboarana lalana fandehanan’ny rano mankany an-tokantrano izay mirefy 64 km. Eo koa ny fanoloana « buses » lehibe ho an’ny tatatra.
Ho fanatanterahana izany indrindra dia halalinina sy halamina ny sisin-dalana mba hahafahan’ny mpandeha tongotra mifamezivezy satria dia 70% ny mponina no mandeha an-tongotra.
Hasiana lamina ny arabe sy ireo toerana hiasana. Halamina ny mpivarotra amoron-dalana (Analakely: JJ Rabearivelo, Super U, Zaimaika, Itokiana, sns). Hampahafantarina ireo mpandraharaha amin’ny Arcade sy parking Avenue fa tokony hifindra amin’ny toerana voatokana ho azy izy ireo.
Vahaolana ho an’ireo mpivarotra ny famindrana azy eo anelanelan’ny Pavillon sy ny Esplanade izay voakasik’izany.
Hafindra eny amin’ny Tsenan’ny Senat ireo mpivarotra sy mpandraharaha eny ambanin’ny Arcade. Napetraka ny parking manokana ho an’ny moto. Efa nisy ny fihaonana tamin’ny ben’ny Tanàna sy ireo solontenan’ny mpivarotra mialoha izany fanapahan-kevitra rehetra izany.
Tatiana A
French