Vaindohan-draharahan’ny FOM, naorin-dRajaonarivelo Herintsalama, ny hanohana ny sehatry ny fandraharahana eto Madagasikara. Ankehitriny, maro ireo tanora mandraharaha saingy mazàna misedra olana samihafa izy ireny. Lohalaharana ny olan’ny famatsiam-bola hanodinana ny orinasa, ny fahaiza-mitantana, sns. Maro ireo miditra fatiantoka, ao koa ireo tsy mahomby ka voatery mampiato ny famokarany sy ny sehatrasany. Antony mahatonga ny FOM hanome tantsoroka hanohanana ireo mpikambana ao aminy. Misy ny fidinana ifotony atao hanangonana sy hamantarana ny sehatrasa sy ny vokatra ataon’ireo mpandraharaha mba hahafahana manoro hevitra hanatsara ny fihariany. « Tanjona ny hivelaran’izy ireny, ny hanitarany ara-teknika na ara-barotra ny fandraharahana ataony. Tafiditra ao anatin’izany ny fanamafisana ny fitantanana noho ireo mpandraharaha sasany mbola misehatra eo amin’ny tsy ara-dalàna ka antony tsy mampivelatra azy » hoy ny tomponandraikitry ny Vaomieran’ny fanofanana eo anivon’ny FOM, Rakotondrainibe Fanja.
Matihanina
Mampanao fiofanana mahakasika ny informatika ho an’ireo mpikambana ao aminy koa ny FOM mba hanamorana ny fitantanana orinasa ho an’ireo mpandraharaha. Manampy azy ihany koa amin’ny fananganana pejy amin’ireo tambajotra sosialy sy tranokala hampahafantarana ny orinasa sy ny tolotra ataony. « Kendrena manokana ny hahamatihanina ireo mpandraharaha sy hidirany eo amin’ny sehatry ny ara-dalàna mba hisitrahany ireo tombontsoa maro samihafa sy maharitra eo amin’ny tsena anatiny sy ivelany », hoy ny mpandrindra ny FOM, Rakotoarimanitra Aina. Notsindriny fa mbola sarotra ho an’ireo tsy manana taratasy ara-dalàna ny hisitraka fampindramam-bola raha tafiditra eo amin’ny tsena anatiny sy ivelany izy ireo. Tanjona, araka izany, ny hanampiana sy hampivoarana ireo orinasa tena madinika, madinika sy salantsalany izay mandray anjara betsaka amin’ny fampandrosoana sy fampiroboroboana ny toekarena eto Madagasikara.
Mpiara-miombona antoka
Miara-miasa amin’ny Tahiry ho famatsiam-bola malagasy ho fampiofanana ny mpiasa (FMFP) ihany koa ny fikambanana hanamafisana sy hanofanana ary hampivoarana ny fandraharahana. « Kendrena ny hanampiana ireo orinasa ho matihanina kokoa. Hahazo tombony amin’izany ireo orinasa efa miorina sy manana sehatrasa mazava nefa mbola tsy mbola matihanina », hoy ny fanazavana voaray.
Manam-pahaizana maro no mandrafitra ny FOM, izay afaka mizara fahalalana marolafy ho an’ireo mpikambana. Ao ireo mpitsara mahafehy ny lalànan’ny orinasa. Ao koa ireo matihanina afaka manoro mahakasika ny lalam-barotra any ivelany. Atao izany mba hahafahan’ireo mpikambana mampivelatra ny fihariany sy hisokafany eo amin’ny tsena iraisam-pirenena.
Mifanohana
Mifampizara traikefa sy toro hevitra ny samy mpikambana na mijanona ho fifaninana ny tontolon’ny fandraharahana sy ny varotra. Tosika ho fampahafantarana ny orinasa sy ny vokatra atao ary ny tolotra ho an’ny mpanjifa ny fandraisana anjara amin’ireo hetsika ara-barotra eto an-toerana.
Ankehitriny, maherin’ny 500 ireo mpikambana eo anivon’ny Fikambanan’ny orinasa malagasy. Malalaka sy misokatra ho an’ny rehetra ny fidirana fa misy ny latsakemboka aloan’izy ireo isan-taona ho fampandehanan-draharaha. « Imasoana tanteraka ny fanampiana sy hanohanana ary ny firaisankinan’ny samy Malagasy, indrindra ireo mpandraharaha tena madinika sy madinika ary salantsalany », hoy ny filoha mpanorina ny fikambanana, Rajaonarivelo Herintsalama.
Marihina fa mandrafitra ny 98% ny toekarena eto Madagasikara ny orinasa madinika. Manome lanja ny vehivavy sy ny tanora mpandraharaha ny fikambanana ho an’ny fahaiza-manao sy fahaiza-mitantan’ireo mpikambana mba hisitrahan’izy ireny fampiofanana sy famatsiam-bola avy amin’ny banky sy mpiara-miombon’antoka lehibe. Tanjona ny hahafahan’ireo orinasa mivelatra sy manatsara hatrany ny tolotra ataony.
Henintsoa Hani
French