Atrikasam-paritr’i Afrika Atsinanana: Hatsaraina ny fitantanan’ireo kaominina ny fako

Mila hatsaraina ny fitantanan’ny kaominina ny fako. Anisan’ny avoitra amin’ny atrikasam-paritr’i Afrika Atsinanana mandritra ny telo andro izany.

Nanomboka omaly hitohy rahampitso ny atrikasam-paritra iraisan’i Afrika Atsinanana momba ny fitantanana ny fako. Tanjona iraisan’ny rehetra ny hanatsarana ny politikam-panjakana momba ny fako sy ny fanamby goavana miandry amin’izany.
Nambaran’ny minisitry ny Fitsinjaram-pahefana sy ny fanajariana ny tany (MFFT), Andriantsitohaina Naina, amin’ny maha minisitera mpiahy ny vondrom-paritra itsinjaram-pahefana fa zava-dehibe tokoa izany. “Andraikitry ny eny anivon’ny kaominina ary fanamby lehibe miandry azy ireo ny fitantanana ny fako”, hoy izy. Nanteriny ny tokony handrindrana ny asa mifanaraka amin’izany sy ny fampahombiazana ny fitantanana. Eo koa ny fiarovana ny fahasalaman’ny daholobe ary ny fampirisihana ireo misehatra amin’ny fanodinana ny fako mba hahazoana tombontsoa sy ho lasa ilaina sy hahasoa izany, araka ny nambarany.
Iarahana amin’ny Firenena mikambana (ONU) sy ny go­vernemanta izao atrikasa mandritra ny telo andro izao. Mi­araka amin’ny eo anivon’ny minisiteran’ny Tontolo iainana sy ny fampandrosoana lovain-jafy (Medd). Notsindriny manokana ny fomba fanangonana mahomby kokoa ny fako sy ny fanamafisana ny fahaiza-manaon’ireo mpitantana eny ifotony momba ny fitantanana ny fako. Samy nifampizara ny fahaiza-manaony sy ny traikefany ireo firenena mandray anjara amin’izao atrikasa izao. Anisan’izany ny paikady hanatsarana ny fomba fanangonana ny fako… Eo koa anefa ny fanajana ny tontolo iainana.

Synèse R.