Tsy hanaiky hijanona ao anaty fahantrana intsony ny vahoakan’Atsimo Andrefana. Andry lehibe ianteheran’izy ireo mankany amin’ny fampandrosoana ny tetikasa Base Toliara.
Nahitsy ny tenin’ny solombavambahoaka Toliara I, sady filoha lefitry ny Antenimierampirenena, faritany Toliara, Tinoka Roberto, ny alakamisy lasa teo, tany Toliara. Nitodika tany amin’ny minisitry ny Fanajariana ny tany (MFT), sady miahy ny faritra Atsimo Andrefana, Andriantsitohaina Naina, ny tenany. « Ampitao any amin’ny governemanta, fa faly ny nanokafana indray ny tetikasa goavana, Base Toliara, ny maro anisa amin’ny vahoaka aty Toliara. Miala tsiny amin’ny hafa aho, fa isika, tsy maintsy miroso ny dia », hoy izy.
Nomarihiny fa hitrandraka ny harena ambanin’ny taniny i Toliara, mba hitondra fampandrosoana, toy ireo firenena efa mandroso rehetra.
Nantsoiny ireo mpanohitra ity tetikasa ity mba hahitsy fo. « Asehoy ny zavatra tsara ho vitanareo, fa tsy ilaozana mampihoroho sy manakorontana, satria tsy haharesy lahatra anay izany. Efa vonona ho any amin’ny fampandrosoana izahay. Fiarahamonina mirindra no ilain’ny vahoakan’i Toliara. Aoka isika hiray hina hampandroso miaraka ny faritra Atsimo Andrefana mba hitsinjovana ny hoavin’ny taranatsika», hoy ihany izy.
Tetikasa lehibe fahatelo
Etsy ankilany, nilaza ny minisitra MFT, Andriantsitohaina Naina, fa “olona manohitra ara-politika izay fanapahan-kevitry ny fanjakana fotsiny ny ataon’ireo tsy manaiky ity tetikasa ity. Efa vita ny fifidianana. Lafiny politika no nataontsika nandritra izay roa taona izay, fa hitodika any amin’ny asa fampandrosoana amin’izay izao. Tsy misy afa-tsy roa ny tetikasa goavana harena an-kibon’ny tany eto amintsika, ka tombondahiny lehibe ho an’i Toliara, ny fisian’ny tetikasa fahatelo, toy izao. Aoka hojeren’ny rehetra ny tombontsoa entiny any amin’ny faritra Atsinanana sy Alaotra Mangoro, sy ny any Anosy”.
Njaka Andriantefiarinesy
French