Nambaran’ny filohan’ny Repoblika, nandritra ny fanapahana fifehezana “Iftar” ara-pirahalahiana nanasana azy fa mivoy ny faharetana, ny fandavan-tena sy ny fankasitrahana ny soa azo rehetra ny ramadany. “Soatoavina anisan’ny ahafahana manorina firenena matanjaka sy mandroso izany”, hoy izy.
Nodimandry omaly, ny depiote teo aloha, voafidy tao Sambava, Jaosoa Jean Pascal. Solombavambahoaka tao Sambava ny taona 1993 hatramin’ny 2007 ny tenany. Efa filoha lefitry ny Antenimierampirenena avy amin’ny faritanin’Antsiranana ny taona 2003 hatramin’ny 2006. Nanao fanambarana fiaraha-miory ny eo anivon’ny Antenimiera.
Miantso ny mpivarotra rehetra hanaraka fandaminana ny governoran’Analamanga, Rasoamaromaka Hery, omaly. Nampanantena koa ny tenany fa tsy maintsy ahitana vahaolana izany. “Tsy misy tsy vitan’ny fifampiresahana”, hoy izy. Tsiahivina fa efa nihaona tamin’ny mpitantana ny CUA ny solontenan’ny mpivarotra saingy mbola nitohy ny hetsika, omaly.
Notolorana mariboninahitra ireo mpiasa miisa 141 ao amin’ny Société municipale d’assainissement- SMA, eo anivon’ny Kaominina Antananarivo Renivohitra, omaly, tetsy Mahamasina. Nisitraka medaly volafotsy ireo 117 ary alimo kosa ho an’ireo 24 ambiny. Tafiditra ao amin’ny fanamarihana ny fahefa-taonan’ny SMA izao lanonana izao.
French