Hampiantrano lalao iraisam-pirenena, taranja tenisy i Madagasikara amin’ity taona ity. Hotanterahina eto an-toerana ny “J30 Circuit mondial”.
Hampiantrano fifaninanana iraisam-pirenena goavana ny Federasionina malagasin’ny tenisy (FMT), amin’ity taona 2025 ity. Nankatoavin’ny Federasionina iraisam-pirenena (ITF) ny fampiantranoan’i Madagasikara ny fifaninanana “J30 Circuit mondial”, sokajy Junior, lahy sy vavy. Nahafeno ny fepetra rehetra notakin’izy ireo ny Federasionina malagasy toy ny kalitaon’ny fitsarana, ny fampiantranoana sy ny toeram-pisakafoana, ny isan’ny kianja sy ny kalitaony, ny fotodrafitrasa rehetra mifandraika amin’izany.
Ny taranja ntenisy izay efa manana mpilalao matihanina maro amin’izao fotoana izao. Betsaka ny mpilalao no mandrato fiofanana any ivelany. Manana ny lanjany sy ny toerany aty Afrika rahateo ny atleta Malagasy amin’ny fahaiza-manaony sy ny traikefany.
Miavaka
Mizara roa miavaka tsara ny fifaninanana hatao eto Madagasikara. Ny dingana voalohany hotanterahina ny 30 septambra ka hatramin’ny 4 oktobra ho avy izao. Ny dingana faharoa, hatao ny 7 ka hatramin’ny 11 oktobra. Tsiahivina fa efa nandray ity fifaninanana ity i Madagasikara nanomboka ny taona 2017, afa-tsy ny tamin’ny taona 2020, fotoana nisian’ny valanaretina Covid-19.
Hanana ny lanjany manokana ny hetsika satria hahazoana isa ho an’ireo mpilalao eo amin’ny filaharana iraisam-pirenena. Anisan’ny vaindohan-draharahan’ny federasionina Malagasy rahateo ny fanohanana ny mpilalao hanana vokatra tsara.
Tompondaka
French