Efa fotoam-bita isan-taona, any Vatomandry. Hahoraka indray ny fetin’ny Paka, mandritra ny andiany faha-13 amin’ny “Festival Dôla Beach”. Niampy ireo karazam-pialamboly, fa ny fampisehoana no lehibe indrindra amin’izany.
Lanonana andro aman’
alina, ny 18 hatramin’ny 21 avrily. Efa anatin’ny famaranana ny fanomanana ireo mpikarakara ny “Festival Dôla Beach” andiany faha-13 amin’ity taona ity. “Izay fialamboly nahitam-pahombiazana rehetra dia hotohizana avokoa. Misy aza ireo izay homena vahana kokoa satria tian’ny mpiala voly. Hotohizana koa ny fitrandrahana ny talenta eny ifotony sy ny fanomezan-danja ny tanora”, hoy ny nambaran’i Alexandre Lay Mein, filohan’ny fikambanana Dola Beach, nandritra ny fihaonana tamin’ny mpanao gazety, omaly, tetsy amin’ny Yas Ankorondrano.
Lehibe indrindra amin’ireo karazana fialamboly isaky ny “Dôla Beach” ny fampisehoana. “Ho avy hatrany i Wawa, satria efa fotoam-bita amin’ny vahoakan’i Vatomandry izy ity. Hitondra hira vaovao”, hoy ny nambaran’ny mpikarakara ny tarika. “Sambany aho handray anjara, ka tena hanomana izay tsara indrindra. Seho roa lehibe ihany no handraisanay anjara amin’ity fetin’ny Paka ity, dia io 18 avrily any Vatomandry io, sy ny 11 avrily eto Antananarivo”, hoy kosa i Black Nadia. Amin’ny maha fanandratana ny talenta eny ifotony, maro ireo mpanakanto zanaky ny faritra no hisedra ny sehatra goavana, ka anisan’izany i Y’Cka’j.
Ankoatra ny fampisehoana lehibe, eo ny “carnaval dancing” hanamarika ny fanombohan’ny hetsika. Ny “cabarets” hiompana amin’ny basesa, ny fifaninanana “miss” sy “mister”, belote, sns. Homena sehatra bebe kokoa ny tolona nentim-pahaharazana amin’ity. Eo koa ny fifaninana ara-panatanjahantena, toy ny beach soccer, rugby beach, sns.
“Fifaninanan-kira no nanombohan’ny hetsika ny taona 2009. Nivelatra tsikelikely teo izany, ka tonga hetsika lehibe mampiakatra ny fihariana sy ny fizahantany rehefa fetin’ny Paka ao Vatomandry. Ankoatra ireo tompon-tany sy ny zanaka am-pielezana, maro ireo mpiala sasatra misafidy an’i Vatomandry, noho izy torapasika akaiky indrindra an’Antananarivo”, hoy hatrany ny mpikarakara.
“Efa nanomboka ny taona 2014 izahay no niara-dalana hampiakarana ny lentan’ny Dôla Beach. Misy akony tsara amin’ny fiharian’ny mponina ao an-toerana, mampiaina ny fizahantany anatiny ary mampiray ny Malagasy, satria mahatratra hatrany amin’ny 20 000 isa isan-taona ny olona vory any Vatomandry amin’io fotoana io”, hoy kosa ny nambaran’i Eli Malala Raherimanjato, tomponandraikitra ao amin’ny Yas Madagascar.
Zo ny Aina
French