Filohan’ny Antenimierampirenena: “Tsy manaotao foana izany ny ben’ny Tanàna”

Nosalorana samboady ny herinandro teo ny ben’ny Tanàn’ i Toamasina, Andria­fa­no­mezantsoa Lovaheritiana Alain, na i Zoky Alain. No­tanterahina teo anoloan’ny Lapan’ny tanàna, eo amin’ny araben’ny fahaleovantena izany. Hentitra ary nazava ny lahatenin’ny filohan’ny Anteni­mi­erampirenena, Tokely Justin. “Tsy manaotao foana izany ny ben’ny Tanàna”, hoy izy. Anisan’izany ireo fepetra noraisin’ny mpitantana, toy ny fanesorana ireo mpivarotra amoron-dalana, ny paikady hifehezana ny fifamoivoizana. Eo koa ny fampanaraham-penitra ny posy sy ny bajaj, ny fanokafana ny lalam-pasika ahafahan’ny kamiaon’ny mpamonjy voina miditra any. Ny fametrahana ny lamina eny anivon’ny tsena mba hisian’ny fampandrosoana marina ko­koa ho an’ i Toamasina, araka ny nambarany. Nanambara koa ny minisitry ny Asa vaventy, Rafidison Richard Theo­dore, fa efa nanokana vola 10 miliara Ar hanamboarana ny lalana antampon-tanànan’ i Toamasina. Nitanisa ny zava-bita tao anatin’ny roa volana nitantanany ny ben’ny Tanàna ka nilaza fa efa maro ny asa natomboka. Niray feo ny rehetra fa handroso i Toamasina, aorian’ izao fahazoana ben’ny Tanàna vaovao vonon-kiasa izao.
Tsiahivina fa nitohy tao amin’ny kaominina Ante­tezam­baro ny hetsika fametrahana samboady ho an’ireo ben’ny Tanàna miisa 18 mandrafitra ny disitrikan’ i Toa­masina II.

Sajo sy Synèse R.