Tena mahavarina ny zava-misy eto an-dRenivohitra tao anatin’ny andro vitsivitsy izao. Midingin-drambo, tsy nanaiky raha tsy nahazo rariny ny mpivarotra amoron-dalana. Nahomby ny fanaovan’izy ireo takalonaina ankolaka sy politika ny fitakiana nataony. Ny mpanohitra lamina sy ny mpandala ny gaboraraka indray izao no tompon’ny teny farany.
Zary mivoaka miditra, tsy mahatazona ny maha izy azy ny tomponandraikitra, manoloana ny tsindry hataon’ny tsy mpanara-dalàna. Izay tokoa angaha no maha saro-pady ilay raharaha. Aiza ka tonga hatrany amin’ny fandrahonana ny hanala baraka ilay tanindrazana iombonana. Ny vahoaka tokoa ve no andriamanjaka?
Hatraiza anefa izay fahafahana hampanjaka ny gaboraraka izay? Toa miha manahirana ny toe-draharaha. Tsy vahaolana ny fileferana sy ny fanarahana ny sitrapon’olom-bitsy tahaka izao. Tsy an’ny mpivarotra samy irery anie ilay Renivohitra. Maro ny olom-pirenena mba te hiaina anaty tanàna madio sy milamina. Sanatrian’ny vava mahazo vahana hatrany ny ratsy!
Mainka hampiroborobo ny kolontsaina tsy mpanara-dalàna sy mpanao izay danin’ny kibony. Izao aza efa tsy ho azo iainana ny tanàna amin’ny hafitsoky ny olon-dratsy sy ny tsimatimanota. Hanao ahoana ny ho fiantraikan’izao fanomezana vahana ny tsy tia filaminana izao? Mandrora mitsilany avokoa Ramalagasy mianakavy. Mba mahafinaritra ve ny miaina anatin’ny korontana? Tsy azontsika an-tsaina ve fa ny fahadiovana sy ny fiarahamonina mirindra no tena antoky ny fampandrosoana ny isam-batan’olona?
Jamban’ilay indray manokona ny olona sasany. Tsy mahavita mijery lavitra intsony. Mampahonena fa tsy manana ilay finiavana ny hanana fiainana tsaratsara kokoa, anatin’ny fanajana ny lamina sy ny rafitra. Tsy hahagaga raha mikorosy andro aman’alina ilay andavanandrom-piainana. Mila fahatongavan-tsaina.
r.r
French