Tovolahy 21 taona, maty voatsatok’antsy tany Andranomaimbo, afakomaly hariva. Voasambotry ny mpitandro filaminana ny nahavanon-doza. Tezitra ny havany sy ny namany ka nanao fitokonana.
Tovolahy 21 taona, maty voatsatok’antsy tany Andranomaimbo, fokontany Ampatana, kaominina Ambanivohitra Antsirabe, afakomaly hariva tamin’ny 6 ora tany ho any. An-dalana handeha hianatra hariva tany amin’ny Centre professionnel ATEC Antsenakely izy sy ny namany roa hafa no nosakanana lehilahy roa nandeha moto, raha ny angom-baovao voaray avy any an-toerana. Tampoka, nisy namely tamin’ny antsy avy an-damosina, nandritra izany, izy ka naratra mafy. Lasa nitsoaka avy hatrany nankany Antsenakely kosa ireo nahavanon-doza taorian’izay. Tratra sy voasambotry ny polisim-pirenena avy amin’ny UIR Antsirabe, izay nanao ny asa fisafoana tany an-toerana, moa io olon-dratsy io.
Nentina teny amin’ny hopitaly CHRR Antsirabe ireo naratra. Namoy ny ainy anefa ity tovolahy ity 20 minitra taorian’ny nahatongavany teny amin’ny hopitaly noho ny ratra mafy nahazo azy. Raha ny fizahana natao taminy, tsindron’antsy avy any an-damosiny ary nivoaka tany amin’ny kibony no nahazo azy ka nitarika ny fahafatesany.
Nirohotra noho ny hatezerana ny fianakaviany
Nisy andian’olona, manodidina ny 30 isa eo ho eo, omaly tamin’ny 9 ora maraina, tonga nirohotra teny anivon’ny kaomisaria foibe Antsirabe. Tonga nitaky ilay olona nahavanon-doza ka nahafaty io tovolahy mpianatra io. Nifampiraharaha tamin’ny lehiben’ny polisy tany an-toerana izy ireo. Napetraka tamin’izany fa faritra tsy azo anaovana fitokonana ny eny an-toerana satria tafiditra ao anatin’ny faritra mena. Nanaiky niala ireo olona ireo taorian’ny fifampiresahana, raha ny angom-baovao voaray avy any an-toerana. Taorian’izay, nanao sakana tany Andranomaimbo indray ry zareo. Tonga nandrava izany ny mpitandro filaminana avy amin’ny polisim-pirenena sy ny zandarimariam-pirenena any Antsirabe.
Olona manana olana amin’ny saina io voasambotra sy nahavanon-doza io, arak any voalazan’ny tomponandraikitry ny toby iray ao an-toerana. Nitsoaka tao amin’ny toby nitsaboana azy izy. Nilaza kosa ny eo anivon’ny polisy fa olona salama saina tsara izy io. Efa manohy ny fanadihadiana sy ny fikarohana ireo olona niaraka tamin’ity voasambotra ity ny mpitandro filaminana.
Mino
French