INDRAY MIJERY

Nitsidika ny minisitry ny Fanabeazam-pirenena, tao Anosy, ny solontenan’ny UNFPA Yaguibou Josiane, omaly. Noresahina, nandritra izany, ny fanamafisana ny fiaraha-miasa. Niarahaba manokana ny minisitra izy ny amin’ny fahaiza-mitarika eo amin’ny sehatry ny fanabeazana amin’ny ankapobeny ary indrindra eo amin’ny fanomezana anjara toerana lehibe ho an’ny vehivavy sy ny ankizivavy.
Ho fanamarihana ny Andro maneran-tany ho an’ny fanentanana momba ny autisme anio, misy ny hetsika atao manerana ireo rantsamangaikan’ny fikambanana miisa 10 manerana an’i Madagasikara. Fihaonana, fijoroana vavolombelona ary fifanakalozana sy ny jiro manga no hanamarika ny andro anio entina hanabeazana, hanentanana ary ho fiaraha-mientana ho fanohanana ireo olona hafakely.
Hopitaly mampiasa ny camera fanaraha-maso ny zava-mitranga ao aminy ny CHU Tanambao I, Antsiranana. Izany dia ho fanamafisana ny fiarovana ireo fananana iombonana sy ireo rehetra misitraka fitsaboana ao aminy. Fakan-tahaka ho an’ireo toeram-pitsaboana izao.
Araka ny angom-baovao avy amin’ny minisiteran’ny Filaminam-bahoaka sy ny minisitera miadidy ny Zandarimariam-pirenena, momba ny fanondranana olona antsokosoko eto Madagasikara, voakasik’izany koa ny asa an-trano. Eo koa ny asa an-terivozona, ​​ny fanambadiana an-tery ary koa ny fanararaotana ara-nofo ho an’ny ankizy.