Mpangarom-paosy sady mpanao sinto-mahery iray voasambotry ny mpitandro filaminana teo Ivandry, boriborintany fahadimy, omaly maraina tamin’ny 6 ora. Norobain’ireo tsy valahara ny mpandeha iray tao anaty taxi-be 162. Niantso vonjy avy hatrany ilay lasibatra sy ireo mpandeha niaraka taminy. Tsy lavitra teo anefa ny mpitandro filaminana iray nanao ny asany. Nahare io hikiaka vao maraina io, nanenjika avy hatrany ilay lehilahy voatondro ho nanao ny fanendahana izy. Tsy lasa alavitra ilay mpanendaka. Tra-tehaka ity farany ary nentina teny anivon’ny biraon’ny mpitandro filaminana. Naverina tamin’ny tompony ny entana nalainy. Nitory io nahavanon-doza io rahateo ilay renim-pianakaviana. Hatolotra ny fampanoavana aorian’ny famotorana azy, araka izany, io lehilahy voasambotra io. Efa mpanao sinto-mahery eny amin’ ny manodidina izy. Tsiahivina, jiolahy efa-dahy mpanao fanendahana mirongo fitaovam-piadiana efatra lavon’ny polisy ny faran’ny herinandro lasa teo. Mpanao asa ratsy teny amin’ny manodidina an’Anosizato Atsinanana ny telo raha toa ka teny Ambodin’Isotry ny iray.
Tsiferana R.
French