Morengy Iarivo: Hisy ady fito hotanterahina

Hotontosaina ny alahady 6 avrily izao, eny amin’ny Kianjan’ny Kanto Mahamasina, ny hetsika “Morengy Iarivo”, andiany voalohany. Hetsika hampisehoana ny maha fanatanjahantena nentim-paharazana ny Morengy izany, araka ny fanazavan’i Thierry Saidani, mpanorina ny Boite Noire, mpikarakara ny hetsika. Ny Boite Noire sy ny Koezy Company no miara-misalahy amin’ny fikarakarana ary nampahafantatra izany teny amin’ny Cité des cultures Antaninarenina, omaly. Ady 7 no hitranga, hahitana ny fandraisana anjaran’ireo Malagasy mpikatroka kalaza manerana ny Nosy. Anisan’ny hifandona, amin’izany, i Black Canon avy amin’ny Club Scorpion sy i Armand, avy amin’ny Boite Noire. Faritra maro no hahatonga solontena, ahitana an’i Sofia, Diana, Alaotra Mangoro, Matsiatra Ambony ary Analamanga izay mampiantrano.
Tsy fifaninanana no tanjona ary tsy misy mpandresy sy resy, araka ny fanazavan’ny mpikarakara. Kolontsaina sy fifanajana no tanjona ary izay indrindra no tena avoitran’ireo mpikatroka. Nanamafy i Goeffrey Gaspard avy amin’ny Koezy Company fa ho feno fahalalana ny taranja Morengy ny mpijery aorian’ity hetsika ity.

Mi.Raz

Partager sur: