Nokendren’ny orinasa MVola manokana ny tanora sy ny ankizy mahakasika ny fanabeazana ara-bola, nandritra ny hetsika Herinandron’ny vola na « Global Money Week » (GMW), natao ny 18 hatramin’ny 23 marsa teo. Anisan’ny nandray anjara tamin’ny atrikasa ny fikambanana Maison des Enfants Vasakosy sy ny mpianatry ny EPP Sabotsy Namehana. Nampianarina tamin’ny fomba tsotra, amin’ny alalan’ny kilalao, ny fomba fitantanam-bola, miaraka amin’ny fampiharana sy fifanakalozana mivantana. Nazava tsara tamin’ny ankizy avy eo ny maha samy hafa ny atao hoe « faniriana » sy ny « filana ». Teo koa ny fahalalana fototra mahakasika ny fitahirizam-bola (épargne) sy ny tena lanjan’ny vola.
Ankoatra izany, miara-miasa ny Foibe mpandrindra nasionaly ny fanabeazana ara-bola (CNFI) sy ny Lycée Andohalo. Nampahafantarina ny tanora ny pitsopitsony ny MVola, ny fiasan’ny banky niomerika, ny teknolojia niomerika ara-bola, lasa manova ny andavanandron’ny Malagasy, ankehitriny.
Njaka A.